پاکستان اور عمان کی بحری افواج کے درمیان سمندری معلومات کے تبادلے پر مفاہمتی یادداشت پر دستخط
- دورے پر آئے عمانی بحریہ کے سربراہ نے پاک بحریہ کی پیشہ ورانہ صلاحیتوں کو سراہا اور خطے میں بحری سلامتی اور استحکام کے قیام میں اس کے مسلسل کردار کا اعتراف کیا
انٹر سروسز پبلک ریلیشنز (آئی ایس پی آر) کے مطابق رائل نیوی آف عمان کے کمانڈر ریئر ایڈمرل سیف بن ناصر بن محسن الرہبی نے منگل کے روز اسلام آباد میں نیول ہیڈکوارٹرز میں چیف آف دی نیول اسٹاف ایڈمرل نوید اشرف سے ملاقات کی ہے۔
ملاقات کے دوران باہمی دلچسپی کے امور، علاقائی بحری سلامتی اور دو طرفہ بحری تعاون پر تبادلہ خیال کیا گیا۔ دورے پر آئے عمانی بحریہ کے سربراہ نے پاک بحریہ کی پیشہ ورانہ مہارت کو سراہا اور خطے میں بحری سلامتی اور استحکام کو یقینی بنانے میں اس کے مسلسل کردار کا اعتراف کیا۔
بعد ازاں، نیول ہیڈکوارٹرز میں منعقدہ ایک تقریب میں ایڈمرل نوید اشرف اور ریئر ایڈمرل الرہبی نے وائٹ شپنگ ( تجارتی اور غیر عسکری بحری جہازوں) سے متعلق معلومات کے تبادلے سے متعلق مفاہمتی یادداشت (ایم او یو) پر دستخط کیے۔ ایم او یو کا مقصد باہمی بحری آگاہی کو فروغ دینے کے لیے معلومات کے تبادلے سے متعلق رہنما اصول اور طریقہ کار وضع کرنا ہے۔
پاکستان اور عمان مشترکہ بحری سرحدوں کے ساتھ جغرافیائی قربت رکھتے ہیں۔ دونوں برادر ممالک کے درمیان دو طرفہ تعلقات اقتصادی تعاون، عوامی روابط اور مضبوط دفاعی شراکت داری سمیت مختلف شعبوں پر محیط ہیں۔
آئی ایس پی آر کے مطابق دونوں بحری افواج ماہرین کی سطح کے اسٹاف مذاکرات، تربیتی پروگراموں، دو طرفہ مشقوں اور کثیرالملکی بحری مشقوں میں شرکت کے ذریعے قریبی پیشہ ورانہ تعلقات برقرار رکھے ہوئے ہیں۔