پاک، عراق تجارتی حجم اصل صلاحیت سے کم ہے، صدر زرداری

صدر مملکت آصف علی زرداری نے عراق کے صدر عبداللطیف جمال راشد سے ملاقات کی۔

صدارتی محل آمد پر صدرِ پاکستان کے اعزاز میں باضابطہ استقبالیہ تقریب منعقد کی گئی اور گارڈ آف آنر پیش کیا گیا۔

ایوان صدر کے پریس ونگ سے جاری بیان کےصدر مملکت آصف علی زرداری اور عراقی صدر کے درمیان ون آن ون ملاقات ہوئی۔ دونوں ممالک کے وفود کی سطح پر مذاکرات میں دوطرفہ تعلقات، باہمی تعاون، علاقائی صورتحال اور اہم عالمی امور پر تبادلہ خیال کیا گیا۔

صدر مملکت نے پرتپاک استقبال اور شاندار میزبانی پر صدر عبداللطیف جمال راشد کا شکریہ ادا کرتے ہوئے کہا کہ بغداد تہذیب، تمدن اور استقامت کی علامت ایک تاریخی شہر ہے۔

انہوں نے عراق میں پارلیمانی انتخابات کے کامیاب انعقاد پر عراقی قیادت اور عوام کو مبارکباد دی اور نئی حکومت کی تشکیل کے لیے نیک تمناؤں کا اظہارکیا۔ انہوں نے عراق کی خودمختاری، علاقائی سلامتی اور قومی وحدت کے لیے پاکستان کی غیرمتزلزل حمایت کا اعادہ کیا۔

دونوں رہنماؤں نے دوطرفہ تعلقات کی موجودہ صورتحال کا جائزہ لیا اور حالیہ اعلیٰ سطح تبادلوں، بشمول پاکستان-عراق مشترکہ وزارتی کمیشن کے نویں اجلاس اور پارلیمانی رابطوں، سے پیدا ہونے والے مثبت ماحول پر اطمینان کا اظہار کیا۔

صدر نے نوٹ کیا کہ موجودہ دوطرفہ تجارتی سطح پاکستان اور عراق کے اقتصادی، ثقافتی اور سکیورٹی تعلقات کی حقیقی صلاحیت کی عکاسی نہیں کرتی۔ انہوں نے تجارت، سرمایہ کاری، زراعت اور دفاعی پیداوار کے شعبوں کو بڑھانے کے مواقع کے ساتھ ساتھ انفارمیشن ٹیکنالوجی، تعمیرات، فارماسیوٹیکل اور متعلقہ صنعتوں پر بھی روشنی ڈالی۔

انہوں نے کاروبار سے کاروبار کی شراکت، باہمی تجارتی وفود اور تجارت و تجارتی سرگرمیوں کی سہولت کے لیے براہِ راست بینکنگ چینلز کے قیام کی اہمیت پر بھی زور دیا۔

صدر زرداری نے موجودہ مین پاور ٹرانسمیشن پر مفاہمت نامے کے تحت ماہر اور نیم ماہر افرادی قوت فراہم کرنے کے ذریعے عراق کی تعمیر نو اور ترقیاتی کوششوں کی حمایت کے لیے پاکستان کی آمادگی کو دہرایا۔ انہوں نے پاکستان کی طبی خدمات، مالی مہارت اور ڈیجیٹل گورننس میں صلاحیت کو اجاگر کیا اور عراق میں ادارہ جاتی صلاحیت سازی کے لیے محفوظ ڈیٹا مینجمنٹ سمیت تکنیکی تجربہ شیئر کرنے کی تیاری کا اظہار کیا۔

صدر نے پاکستانی زائرین کے لیے عراق میں سہولتوں کو بہتر بنانے کی درخواست کی اور زیارت کے انتظامات کے لیے تجویز کردہ مفاہمت نامے کی جلد حتمی منظوری اور نفاذ کی امید کا اظہار کیا جس کا مقصد منظم سفر کو یقینی بنانا اور مذہبی زیارتوں سے متعلق طویل المدتی مسائل کو حل کرنا ہے۔

صدر نے یہ بھی واضح عزم ظاہر کیا کہ وہ عراق کی حکومت کے ساتھ مل کر ان پاکستانی شہریوں کی غیر قانونی داخلہ اور طویل قیام کو روکنے کے لیے کام کریں گے جو عراقی قانون کی خلاف ورزی کرتے ہیں۔

دونوں صدور نے انتہاپسندی، دہشت گردی اور منشیات کی تجارت کے خلاف مشترکہ جدوجہد کرنے اور دوطرفہ تعاون کو بڑھانے کے عزم کا اظہار کیا۔

دونوں رہنماؤں نے سیاسی، اقتصادی اور سماجی شعبوں میں دوطرفہ تعاون کو مزید گہرا کرنے کے لیے اپنی وابستگی کا اعادہ کیا اور باہمی مفاد کے امور پر علاقائی اور کثیرالجہتی فورمز، بشمول اقوام متحدہ اور او آئی سی، میں قریبی ہم آہنگی جاری رکھنے پر اتفاق کیا۔

عراقی صدر نے امت کو متحد کرنے میں پاکستان کے کردار اور فلسطین کے عوام کو تاریخی حمایت کو سراہا۔

صدر کے ہمراہ سینیٹر شیری رحمان، سینیٹر سلیم مندوی والا، سردار سلیم حیدر خان (گورنر پنجاب)، شرجیل انعام میمن (سینئر صوبائی وزیر، حکومت سندھ)، سید ناصر حسین شاہ (صوبائی وزیر سندھ)، سید نیر حسین بخاری (سابق چیئرمین سینیٹ) اور پاکستان کے سفیر برائے عراق موجود تھے۔

کاپی رائٹ بزنس ریکارڈر 2025