لکی موٹر کی کیا اسپورٹیج ایل ہائبرڈ کی قیمتوں میں 8 لاکھ روپے تک کمی

لکی موٹر کارپوریشن نے محدود مدت کی تشہیری پیشکش کے تحت اپنی کیا اسپورٹیج ایل ہائبرڈ کے مختلف ماڈلز کی ایکس فیکٹری قیمتوں میں 8 لاکھ روپے تک کمی کردی ہے۔ نئی قیمتوں کا اطلاق 3 نومبر سے ہوگیا ہے۔

کمپنی کی جانب سے جاری کردہ نوٹیفکیشن کے مطابق، 1.6 ٹی ایف ڈبلیو ڈی ایچ ای وی کی قیمت میں 7 لاکھ روپے کمی کی گئی ہے جس کے بعد اس کی قیمت ایک کروڑ 21 لاکھ 99 ہزار روپے سے کم ہوکر ایک کروڑ 14 لاکھ 99 ہزار روپے ہوگئی ہے۔

اسی طرح 1.6 ٹی اے ڈبلیو ڈی ایچ ای وی کی قیمت 8 لاکھ روپے گھٹا دی گئی ہے جس کے بعد اس کی نئی قیمت ایک کروڑ 24 لاکھ 99 ہزار روپے مقرر کی گئی جو اس سے قبل ایک کروڑ 32 لاکھ 99 ہزار روپے تھی۔

کمپنی کے مطابق ان تشہیری قیمتوں کا اطلاق ان تمام نئے آرڈرز پر ہوگا جو اس کے ڈیلر مینجمنٹ سسٹم میں بک کرائے جائیں گے اور جن کی مکمل ادائیگی 30 نومبر تک موصول ہوجائے گی۔

نوٹیفکیشن میں واضح کیا گیا ہے کہ تمام ادائیگیاں لکی موٹر کارپوریشن کے نام پر متعلقہ صارف کے اکاؤنٹ میں جمع کرائی جائیں۔

کمپنی نے مزید کہا کہ حکومت کی جانب سے عائد کردہ کوئی بھی نئے یا اضافی ڈیوٹیز، ٹیکسز یا چارجز جن کے باعث قیمتوں میں ردوبدل ہو اور جو گاڑی کی حوالگی کے وقت نافذ العمل ہوں، صارف کو ادا کرنا ہوں گے۔

کمپنی کے مطابق اعلان کردہ ایکس فیکٹری قیمتوں میں مال برداری اور انشورنس کے اخراجات شامل نہیں ہیں۔