محکموں کے درمیان ہم آہنگی کا فقدان، ایف بی آر کی ٹیکس بیس بڑھانے کی کوششیں تعطل کا شکار

فیڈرل بورڈ آف ریونیو کی ٹیکس بیس کو وسیع کرنے کی کوششوں کو محکموں کے درمیان کوآرڈینیشن کے فقدان کی وجہ سے مشکلات کا سامنا کرنا پڑا ہے جس کی وجہ سے حالیہ ترامیم کے بعد سیلز ٹیکس رجسٹریشن کے عمل میں رکاوٹیں پیدا ہوئی ہیں۔

کراچی ٹیکس بار ایسوسی ایشن (کے ٹی بی اے) کی جانب سے چیئرمین ایف بی آر کو بھیجے گئے خط کے مطابق ان لینڈ ریونیو انفارمیشن سسٹم (آئی آر آئی ایس) نے لوکل رجسٹریشن افسران (ایل آر اوز) کو سیلز ٹیکس رجسٹریشن کی درخواستیں قبول کرنے کی اجازت نہیں دی اور وہ مذکورہ تکنیکی حدود کی وجہ سے درخواستیں قبول یا مسترد کرنے سے قاصر ہیں۔

یہ معاملہ ایف بی آر کی جانب سے ایس آر او 350(آئی)/2024 متعارف کرانے کے بعد سامنے آیا جس میں سیلز ٹیکس رولز کے رول 5 کے تحت افراد، فرموں اور سنگل ممبر کمپنیوں کے لیے سیلز ٹیکس رجسٹریشن کے عمل پر پابندی عائد کردی گئی تھی۔ ترامیم میں کہا گیا ہے کہ آئی آر آئی ایس پر کارروائی کرنے سے پہلے رجسٹریشن درخواستوں کو ایل آر او سے منظوری لینے کی ضرورت ہوگی۔

اگرچہ ایف بی آر نے ٹیکس نیٹ کو وسعت دینے اور ٹیکس طریقہ کار کے غلط استعمال سے بچنے کے لئے موبائل سموں کو بلاک کرنے، ایس آر او 350 (آئی)/2024 جیسے اقدامات اٹھائے ہیں، لیکن محکموں کے مابین ہم آہنگی کا فقدان ان اقدامات کو غیر موثر بنا رہا ہے، جس سے ٹیکس اتھارٹی کے لئے ”مشکل صورتحال“ پیدا ہو رہی ہے۔ کے ٹی بی اے کی جانب سے چیئرمین ایف بی آر کو لکھے گئے خط میں کہا گیا ہے کہ اگرچہ ایل آر اوز آئی آر آئی ایس پر جمع کرائی گئی درخواستوں کو دیکھ سکتے ہیں لیکن ان کے پاس انہیں قبول یا مسترد کرنے کے لیے ضروری اختیارات نہیں ہیں جس کی وجہ سے درخواستیں غیر معینہ مدت تک زیر التوا رہ جاتی ہیں۔

کے ٹی بی اے نے چیئرمین ایف بی آر سے درخواست کی کہ وہ پی آر اے ایل ٹیم کو آئی آر آئی ایس پورٹل پر ضروری تبدیلیاں کرنے کی ہدایت کریں تاکہ ایل آر اوز سیلز ٹیکس رجسٹریشن کی درخواستوں کو موثر طریقے سے نمٹا سکیں۔

چونکہ ایف بی آر کا مقصد ٹیکس بیس کو وسیع کرنا ہے، سیلز ٹیکس رجسٹریشن کے عمل میں رکاوٹ بننے والے کوآرڈینیشن اور تکنیکی مسائل کو حل کرنا اس کے اقدامات پر بلا رکاوٹ عملدرآمد کو یقینی بنانے کے لئے اہم ہو گیا ہے۔

کاپی رائٹ بزنس ریکارڈر، 2024