ڈیوڈ وارنر کا کرکٹ آسٹریلیا پر سینڈ پیپر اسکینڈل میں حقائق چھپانے کا الزام

سابق آسٹریلوی بیٹر ڈیوڈ وارنر نے ہفتے کو 2018 کے بال ٹیمپرنگ اسکینڈل سے نمٹنے کے کرکٹ آسٹریلیا کے طریقۂ کار کو کڑی تنقید کا نشانہ بناتے ہوئے اسے حقائق چھپانے کی کوشش قرار دیا۔ ان کے اس بیان سے کرکٹ کے حلقوں میں جاری تنازع مزید شدت اختیار کر گیا ہے

سابق اوپنر ڈیوڈ وارنر جن پر کیپ ٹاؤن میں پیش آنے والے سینڈ پیپر واقعے میں کردار ادا کرنے پر ایک سال کی پابندی عائد کی گئی تھی نے کرکٹ آسٹریلیا کی مبینہ طور پر ناقص تحقیقات پر شدید تنقید کی۔

انہوں نے انسٹاگرام پر لکھا کہ جہاں تک مجھے علم ہے، کرکٹ آسٹریلیا (سی اے) نے 2018 کی تحقیقات کے دوران جوش ہیزل ووڈ، مچل اسٹارک یا نیتھن لیون سے پوچھ گچھ نہیں کی تھی۔

اگر یہ بات درست ہے تو پھر کرکٹ آسٹریلیا یہ مؤقف کیسے اختیار کر سکتا ہے کہ بولرز کو اس معاملے کا علم نہیں تھا؟

وارنر کے مطابق ایسا لگتا ہے کہ انہوں نے ابتدا ہی میں فیصلہ کر لیا تھا کہ کس کو موردِ الزام ٹھہرانا ہے، پھر اسی مقصد کے تحت ناقص تحقیقات کیں اور اب وہ اس غلط بیانیے کو برقرار رکھنا چاہتے ہیں کہ بولرز کو اس معاملے کا کوئی علم نہیں تھا۔

یہ معاملہ حقائق چھپانے کی کوشش کی بو دیتا ہے۔

واضح رہے کہ یہ تنازع سابق آسٹریلوی اوپنر عثمان خواجہ کی خودنوشت کتاب صبر میں کیے گئے انکشافات کے بعد دوبارہ سامنے آیا ہے۔

عثمان خواجہ نے دعویٰ کیا تھا کہ 2018 میں جنوبی افریقا کے دورے کے دوران آسٹریلوی ٹیم کے ڈریسنگ روم میں گیند کے ساتھ چھیڑ چھاڑ کے منصوبے کا علم کئی کھلاڑیوں کو تھا، جن میں بولرز بھی شامل تھے۔

واضح رہے کہ 2018 میں جنوبی افریقا کے خلاف کیپ ٹاؤن ٹیسٹ کے دوران آسٹریلوی کھلاڑی کیمرون بینکرافٹ کو کیمرے کی آنکھ نے گیند پر سینڈ پیپر رگڑتے ہوئے پکڑ لیا تھا۔ اس واقعے کے بعد اس وقت کے کپتان اسٹیو اسمتھ، نائب کپتان ڈیوڈ وارنر اور کیمرون بینکرافٹ کو پابندیوں کا سامنا کرنا پڑا تھا جبکہ کرکٹ آسٹریلیا نے بھی ٹیم کے رویے اور ماحول کا جائزہ لیا تھا۔

دوسری جانب آسٹریلوی کپتان پیٹ کمنز نے جمعہ کے روز سڈنی میں پریس کانفرنس کے دوران عثمان خواجہ کے الزامات کو مسترد کردیا تھا۔

کمنز نے ان دعوؤں کو سو فیصد غلط اور مکمل طور پر بے بنیاد بات قرار دیتے ہوئے کہا تھا کہ انہیں اس بات کا کوئی علم نہیں تھا کہ میدان میں سینڈ پیپر لے جایا گیا ہے۔ انہوں نے بال ٹیمپرنگ کے منصوبے میں مرکزی کردار ہونے کے الزام کی بھی تردید کی۔

آسٹریلوی کپتان کا کہنا تھا کہ انہیں یہ جان کر بھی حیرت ہوئی کہ عثمان خواجہ نے سینڈ پیپر استعمال کرتے وقت کیمرون بینکرافٹ کو محتاط رہنے کا مشورہ دیا تھا۔