ٹیسلا کا سائبر ٹرک کے زیر التوا آرڈرز مکمل کرنے کیلئے اضافی شفٹ شروع کرنے کا فیصلہ

ٹیسلا کے چیف ایگزیکٹو آفیسر ایلون مسک نے کہا ہے کہ کمپنی سائبر ٹرک کے زیر التوا آرڈرز مکمل کرنے کے لیے ایک اضافی پروڈکشن شفٹ شروع کرے گی، جس کے بعد اگلے سال سائبر کیب کی پیداوار بڑھانے کے لیے سائبر ٹرک کی پروڈکشن لائن ختم کردی جائے گی۔

ایلون مسک نے ہفتے کو سوشل میڈیا پلیٹ فارم ایکس پر ایک بیان میں کہا کہ سائبر ٹرک کے زیر التوا آرڈرز کی تعداد اتنی زیادہ ہے کہ اگلے سال جون یا جولائی میں سائبر کیب کی پیداوار میں توسیع کے لیے پروڈکشن لائن بند ہونے سے پہلے تمام آرڈرز مکمل کرنا ممکن نہیں ہوگا۔ انہوں نے کہا کہ اس مقصد کے لیے ایک اضافی شفٹ شروع کی جائے گی۔

یہ بیان ان کے اس اعلان کے ایک روز بعد سامنے آیا ہے جس میں انہوں نے ٹیکساس کے پلانٹ میں سائبر ٹرک کی پیداوار بتدریج ختم کرکے وسائل دو نشستوں والی خودکار ٹیکسی سائبر کیب کی تیاری پر منتقل کرنے کا کہا تھا۔

سائبر کیب ایلون مسک کے اس منصوبے کا اہم حصہ ہے جس کے تحت وہ ٹیسلا کو محض گاڑیاں بنانے والی کمپنی کے بجائے مصنوعی ذہانت اور روبوٹکس کے شعبے میں وسعت دینا چاہتے ہیں۔

2023 کے آخر میں صارفین کو فراہم کیے جانے والے سائبر ٹرک کی فروخت توقعات سے کم رہی۔ کیلی بلیو بک کے مطابق امریکا میں اس کی فروخت 2024 کے تقریباً 39 ہزار یونٹس سے کم ہوکر گزشتہ سال 20 ہزار رہ گئی، جبکہ ایلون مسک نے سالانہ ڈھائی لاکھ گاڑیوں کی فروخت کا تخمینہ لگایا تھا۔ گاڑی کو بار بار واپس منگوانے اور معیار سے متعلق شکایات کا بھی سامنا رہا ہے۔