آسٹریلیا نے فیصلہ کن ٹیسٹ سے قبل اسمتھ کو فٹنس ثابت کرنے کا موقع دے دیا

آسٹریلوی کپتان پیٹ کمنز نے کہا ہے کہ جنوبی افریقا کے خلاف تیسرے اور آخری ٹیسٹ سے قبل تجربہ کار بلے باز اسٹیو اسمتھ کو فٹنس ثابت کرنے کے لیے زیادہ سے زیادہ وقت دیا جائے گا۔

اسمتھ کو گکیبرہا میں دوسرے ٹیسٹ کے دوران گردن میں چوٹ لگی تھی، جہاں جنوبی افریقا نے اننگز اور 31 رنز سے کامیابی حاصل کرکے سیریز 1-1 سے برابر کردی تھی۔ فیصلہ کن ٹیسٹ منگل سے کیپ ٹاؤن میں شروع ہوگا۔

کمنز کے مطابق ٹیم کا اعلان اس وقت کیا جائے گا جب اسمتھ کی فٹنس کے حوالے سے آخری مرحلہ واضح ہوجائے گا۔ انہوں نے بتایا کہ کیمرون گرین کو مڈل آرڈر میں کھلانے کا امکان ہے، جس کے باعث میٹ رینشا اور ٹریوس ہیڈ اننگز کا آغاز کرسکتے ہیں۔

کمنز نے اسمتھ کی حالیہ کارکردگی اور ٹیم کے لیے ان کی خدمات کو سراہتے ہوئے کہا کہ وہ دورے کے دوران ٹیم کے ساتھ بھرپور طور پر منسلک رہے ہیں۔ اسمتھ چار اننگز میں 20 سے کچھ زائد کی اوسط سے رنز بنا سکے ہیں۔ انہیں پہلے ٹیسٹ میں سر پر گیند لگی تھی، جبکہ دوسرے میچ میں گردن زخمی ہوگئی۔

کمنز نے کہا کہ اسمتھ عظیم بلے بازوں میں شمار ہوتے ہیں اور طویل ٹیسٹ کیریئر میں کبھی کبھار مکمل فٹنس کے بغیر بھی کھیلنا پڑتا ہے۔