فیڈرل ریزرو پر نظریں، امریکی ڈالر میں جاری کمی کا سلسلہ تھم گیا

عالمی منڈی میں جمعرات کو امریکی ڈالر کی قدر میں جاری کمی کا سلسلہ رک گیا، کیونکہ سرمایہ کار آئندہ ہفتے جاپان، امریکہ اور یورپ کے مرکزی بینکوں کے اہم اجلاسوں سے قبل محتاط انداز اپنا رہے ہیں۔ توقع ظاہر کی جا رہی ہے کہ ان اجلاسوں میں شرح سود میں اضافہ کیا جا سکتا ہے یا انہیں موجودہ اعلیٰ سطح پر برقرار رکھا جائے گا۔

کرنسی مارکیٹ میں امریکی معیشت کی مضبوطی اور مصنوعی ذہانت (اے آئی) کی بڑھتی ہوئی مانگ کی بدولت ڈالر کی مانگ اب بھی مضبوط ہے، جس سے طویل عرصے تک شرح سود بلند رہنے کی توقعات کو تقویت مل رہی ہے۔

دوسری جانب برطانیہ میں توقع سے زیادہ افراط زر کے باعث پاؤنڈ اسٹرلنگ کی قدر 1.3395 ڈالر پر مستحکم رہی، جبکہ آسٹریلین ڈالر 0.7025 ڈالر کی سطح پر موجود رہا۔ نیوزی لینڈ میں آئندہ ہفتے شرح سود میں اضافے کی توقعات کے باعث کیوی ڈالر ایک ماہ کی بلند ترین سطح 0.5709 پر پہنچ گیا۔ آسٹریلین ریزرو بینک کے نائب گورنر اینڈریو ہاؤزر نے تیل کی بڑھتی قیمتوں کے باعث افراط زر کی صورتحال پر تشویش کا اظہار کیا ہے۔

یورو اور جاپانی ین محدود حد میں رہے۔ جاپانی ین 158 فی ڈالر کے قریب رہا، جبکہ یورو 1.12 ڈالر سے اوپر مستحکم رہا، حالانکہ فرانس میں مالیاتی بحران اور احتجاجی مظاہروں کے باعث یورو پر دباؤ موجود ہے۔

توقع ہے کہ یورپی سینٹرل بینک اگلے ہفتے شرح سود 2.5 فیصد پر برقرار رکھے گا، جبکہ امریکی فیڈرل ریزرو بھی اکتوبر میں شرح سود 3.75 سے 4 فیصد کے درمیان برقرار رکھ سکتا ہے، تاہم دسمبر میں شرح سود میں اضافے کا امکان ظاہر کیا جا رہا ہے۔