سہ ملکی سیریز کے افتتاحی میچ میں سلمان آغا کی سنچری، پاکستان کے 305 رنز

سلمان آغا نے اتوار کو راولپنڈی میں سری لنکا کے خلاف سہ ملکی ون ڈے سیریز کے افتتاحی میچ میں سنچری بنا کر بین الاقوامی کرکٹ میں واپسی کو یادگار بنادیا، جس کی بدولت پاکستان نے 305 رنز بنائے۔

32 سالہ بیٹر نے 90 گیندوں پر ایک چھکے اور 10 چوکوں کی مدد سے 107 رنز بنا کر پاکستان کی اننگز کو سہارا دیا۔ اچھی رفتار والی پچ پر پہلے بیٹنگ کی دعوت ملنے کے بعد پاکستانی ٹیم 49.5 اوورز میں آل آؤٹ ہوگئی۔

سلمان آغا کے لیے گزشتہ تین ماہ مایوس کن رہے تھے۔ انگلینڈ کے خلاف پہلے ٹیسٹ میں ٹیم کی قیادت کرنے کے بعد انہیں اگست میں تیسرے ٹیسٹ سے قبل وطن واپس بھیج دیا گیا تھا۔

سلمان علی آغا نے فاسٹ بولر اسیتھا فرنینڈو کو مسلسل دو چوکے لگا کر اپنی چوتھی ون ڈے انٹرنیشنل سنچری مکمل کی، تاہم 47 ویں اوور میں وہ اسی بولر کی گیند پر آؤٹ ہوگئے۔

انہوں نے پانچویں وکٹ کے لیے حسن نواز کے ساتھ 97 رنز کی شراکت قائم کی۔ حسن نواز نے 37 رنز بنائے۔ اس کے بعد چھٹی وکٹ کے لیے عرفات منہاس کے ساتھ مزید 64 رنز جوڑے۔ عرفات نے 18 رنز اسکور کیے۔

بائیں ہاتھ کے فاسٹ بولر دلشان مدوشنکا نے اوپنرز صائم ایوب (7) اور فخر زمان (16) کو آؤٹ کرکے پاکستان کو مشکلات سے دوچار کردیا۔

ڈیبیو کرنے والے سعد بیگ نے جارحانہ بیٹنگ کرتے ہوئے 40 گیندوں پر دو چھکوں اور تین چوکوں کی مدد سے 39 رنز بنائے۔ انہوں نے بابر اعظم (45) کے ساتھ 74 رنز کی شراکت قائم کرکے ٹیم کا مجموعہ بہتر بنایا۔

فاسٹ بولر ایشان ملنگا نے مسلسل دو اوورز میں دونوں بیٹرز کو آؤٹ کرکے پاکستان کی پیش قدمی روک دی، تاہم اس کے بعد سلمان آغا نے ذمہ دارانہ بیٹنگ کا مظاہرہ کیا۔

ملنگا سری لنکا کے سب سے کامیاب بولر رہے۔ انہوں نے کیریئر کی بہترین کارکردگی دکھاتے ہوئے 46 رنز دے کر 4 وکٹیں حاصل کیں، جبکہ فرنینڈو نے 59 رنز کے عوض 3 کھلاڑیوں کو آؤٹ کیا۔سہ ملکی سیریز میں انگلینڈ تیسری ٹیم ہے۔