سعودی اتحاد کی حوثیوں کیخلاف بڑی کارروائی، 100 سے زائد فوجی اہداف تباہ کرنے کا دعویٰ

سعودی عرب کی قیادت میں قائم فوجی اتحاد نے ہفتے کو یمن میں حوثیوں کے زیرِ قبضہ علاقوں میں بڑے پیمانے پر کارروائی کرتے ہوئے 100 سے زائد فوجی اہداف تباہ کرنے کا دعویٰ کیا ہے۔

حوثیوں اور یمن کی بین الاقوامی طور پر تسلیم شدہ حکومت کے درمیان تنازع جولائی میں دوبارہ شدت اختیار کرگیا تھا جس کے بعد یہ پڑوسی ملک سعودی عرب تک بھی پھیل گیا ہے۔

سعودی اتحاد کے ترجمان ترکی المالکی نے سوشل میڈیا پلیٹ فارم ایکس پر لکھا کہ ہم حوثی ملیشیا کے اہلکاروں اور اس کی جنگی صلاحیتوں کو نشانہ بنانے کے لیے بڑے پیمانے پر کارروائی کررہے ہیں۔

انہوں نے ایک علیحدہ پوسٹ میں کہا کہ ہم نے حوثی ملیشیا کے زیرِ کنٹرول علاقوں میں 136 فوجی اہداف تباہ کردیے ہیں۔

حوثیوں کے ٹی وی چینل المسیرہ نے اطلاع دی کہ سعودی میزائلوں نے یمن کے شمال مغربی صوبے صعدہ کے مختلف علاقوں کو نشانہ بنایا۔

یمن میں بحیرۂ احمر کے ساحلی علاقوں پر قبضہ کرنے کے علاوہ حوثی باغیوں نے دنیا کے سب سے بڑے خام تیل برآمد کرنے والے ملک سعودی عرب میں ڈرونز اور میزائلوں کے ذریعے ٹرانسپورٹ مراکز، تیل کی تنصیبات اور دیگر شہری اہداف کو بھی نشانہ بنایا ہے۔

سعودی عرب نے جمعہ کو بتایا کہ ایک روز قبل ریاض کے بین الاقوامی ہوائی اڈے پر حملوں میں تین افراد جاں بحق ہوئے تھے۔ حوثیوں نے بھی اس روز ہوائی اڈے کو نشانہ بنانے کا دعویٰ کیا تھا۔

ذرائع ابلاغ کے مطابق یمن کے دارالحکومت صنعا میں حوثیوں کے زیرِ کنٹرول ہوائی اڈے پر سعودی حملوں کے نتیجے میں دو افراد مارے گئے۔

سعودی عرب اور یمن کی حکومتی افواج حوثیوں کی پیش قدمی روکنے میں مشکلات کا سامنا کررہی ہیں۔ یہ کوششیں ایسے جوابی حملوں کے باوجود جاری ہیں جن کا مقصد حوثیوں کے قبضے سے علاقے واپس لینا ہے۔ ان میں باب المندب آبنائے کے آس پاس کا علاقہ بھی شامل ہے جو عالمی بحری تجارت کے لیے انتہائی اہمیت رکھتا ہے۔