ریاض ایئرپورٹ پر حملوں میں تین شہری جاں بحق، سعودی ایوی ایشن اتھارٹی

سعودی عرب کی سول ایوی ایشن اتھارٹی نے بتایا کہ ریاض کے شاہ خالد انٹرنیشنل ایئرپورٹ پر دو حملوں میں تین سعودی شہری جاں بحق اور متعدد افراد زخمی ہوگئے۔

اتھارٹی کے مطابق پہلا حملہ ایئرپورٹ کی تنصیبات جبکہ دوسرا سعودی قومی فضائی کمپنی سعودیہ کے ایک طیارے پر کیا گیا۔ زخمیوں میں معمولی سے شدید نوعیت کے زخموں کا شکار افراد شامل ہیں، جبکہ حملوں سے املاک کو بھی نقصان پہنچا۔ حکام کا کہنا ہے کہ ایئرپورٹ پر آپریشن بحال اور فضائی آمدورفت معمول پر آگئی ہے۔

یمن کے حوثیوں نے جمعرات کو دعویٰ کیا تھا کہ انہوں نے ایئرپورٹ کو دو کروز میزائلوں سے نشانہ بنایا۔ گروپ نے جنوب مغربی شہر نجران کے ایئرپورٹ اور خمیس مشیط کے فضائی اڈے پر بھی حملوں کا دعویٰ کیا، تاہم سعودی حکام نے نجران سے متعلق دعوے کی تصدیق نہیں کی۔

حوثیوں کا کہنا ہے کہ وہ یمن کی خانہ جنگی میں حکومتی فورسز کی سعودی حمایت کے خلاف کارروائیاں کر رہے ہیں، جبکہ سعودی عرب اقوام متحدہ سے تسلیم شدہ یمنی حکومت کی جانب سے حوثیوں کے زیر قبضہ علاقوں کا کنٹرول واپس لینے کی کارروائی کی حمایت کر رہا ہے۔

سعودی حکام نے بدھ کو بھی ریاض اور جنوب مغربی شہر ابہا کے ایئرپورٹس پر رواں ہفتے ہونے والے حملوں میں تین افراد کی اموات کی اطلاع دی تھی۔

امریکا اور ایران کی جنگ سے پھیلنے والا یہ تنازع خطے میں عدم استحکام بڑھا رہا ہے اور دیگر ممالک کو بھی لڑائی میں کھینچنے کا خدشہ پیدا ہوگیا ہے۔