بھارتی اپوزیشن کا ارکانِ پارلیمنٹ کے خلاف پولیس کارروائی پر احتجاج، چیف الیکشن کمشنر سے استعفے کا مطالبہ

بھارتی اپوزیشن جماعتوں نے جمعرات کو مسلسل تیسرے روز احتجاج کرتے ہوئے کانگریس رہنماؤں کے خلاف پولیس کارروائی کی مذمت کی اور ووٹر فہرستوں میں متنازع نظرثانی پر چیف الیکشن کمشنر گیانیش کمار سے استعفے کا مطالبہ کیا۔

اپوزیشن جماعتیں، ان کی طلبہ تنظیمیں اور ’’کاکروچ‘‘ یوتھ موومنٹ چیف الیکشن کمشنر کے استعفے کے لیے تقریباً روزانہ مظاہرے کر رہی ہیں۔ اپوزیشن نے وزیراعظم نریندر مودی کی حکمران جماعت بھارتیہ جنتا پارٹی (بی جے پی) پر الزام عائد کیا ہے کہ وہ اپنے مقرر کردہ عہدیداروں، جن میں گیانیش کمار بھی شامل ہیں، کی ملی بھگت سے ووٹر فہرستوں میں اپنے حق میں ردوبدل کر رہی ہے۔ الیکشن کمیشن اور بی جے پی نے الزامات مسترد کردیئے ہیں۔

خبر رساں ادارے اے این آئی کے مطابق تلنگانہ میں کانگریس کے درجنوں کارکنوں نے احتجاجی مارچ کیا، جبکہ بہار میں اپوزیشن جماعت راشٹریہ جنتا دل نے بھی مظاہرہ کیا۔ بنگلورو میں سیکڑوں نوجوان مظاہرین نے ’’ہر نام اہم ہے، ہر ووٹ اہم ہے‘‘ اور ’’جمہوریت کا قتل بند کرو‘‘ کے نعروں والے پوسٹر اٹھا رکھے تھے۔

22 سالہ طالبہ خوشی شریواستو نے کہا کہ ووٹ کا حق جمہوریت کی بنیادی ضرورت ہے اور ووٹ ڈالنے کے خواہش مند لوگوں کو اس حق سے محروم کیا جا رہا ہے۔