سیاسی اور مالیاتی خدشات، یورو 17 ماہ کی کم ترین سطح کے قریب پہنچ گیا

یورو منگل کو 17 ماہ کی کم ترین سطح کے قریب رہا، جس کی وجہ یورو زون میں سیاسی غیر یقینی اور مالیاتی خدشات کا دباؤ ہے، جبکہ امریکی ٹریژری ییلڈز میں اضافے کے باعث ڈالر کی قدر میں تیزی کا سلسلہ جاری رہا۔

ایشیائی کاروباری سیشن کے ابتدائی حصے میں یورو معمولی کمی کے بعد 1.1220 ڈالر پر آگیا۔ گزشتہ سیشن میں یورو مئی 2025 کے بعد کم ترین سطح پر پہنچ گیا تھا، جبکہ گزشتہ ہفتے اس کی قدر میں 1.2 فیصد کمی ریکارڈ کی گئی۔ برطانوی پاؤنڈ کے مقابلے میں بھی یورو گزشتہ ہفتے ایک فیصد سے زیادہ کمزور ہوا۔

یورو پر فرانس میں بلند قرضوں اور سیاسی تعطل کے خدشات کا دباؤ ہے، جبکہ اسپین میں قبل از وقت انتخابات کی توقعات نے بھی یورو زون کی مشترکہ کرنسی کے لیے مشکلات بڑھا دی ہیں۔ فرانس کی قرض لینے کی لاگت میں اضافے کے اثرات یورو زون کے دیگر ممالک تک پہنچنے سے بھی مالیاتی خدشات میں اضافہ ہوا ہے۔

کامن ویلتھ بینک آف آسٹریلیا کے حکمت کار جوزف کیپرسو نے کہا کہ یورو کے حوالے سے ان کا نقطۂ نظر مایوس کن ہے اور امکان ہے کہ یہ 1.10 ڈالر سے نیچے چلا جائے۔ ان کے مطابق یورو میں بہتری کے لیے تیل کی قیمتوں میں نمایاں کمی، یورپی مالیاتی پالیسی میں سختی کی توقعات میں اضافہ یا بجٹ خسارے کو کم کرنے کے لیے مؤثر اقدامات ضروری ہیں۔

دوسری جانب امریکی ڈالر نے مزید پیش قدمی کی۔ ڈالر انڈیکس 102.16 پر پہنچ گیا، جو گزشتہ سیشن میں 18 ماہ کی بلند ترین سطح پر پہنچا تھا۔ ڈالر ین کے مقابلے میں معمولی اضافے سے 157.92 ین رہا، جبکہ پاؤنڈ 0.02 فیصد کم ہوکر 1.3222 ڈالر پر آگیا۔

کمزور امریکی روزگار کے اعداد و شمار کے باعث رواں ماہ شرح سود میں اضافے کی توقعات کم ہونے کے باوجود سرمایہ کاروں کو امریکی مرکزی بینک کی جانب سے مزید سخت پالیسی کا امکان نظر آ رہا ہے۔