ایکسپورٹرز کا وزیراعظم کی برآمدات بڑھانے کی پالیسی کی بھرپور حمایت کا اعلان

آل پاکستان ایکسپورٹرز ایسوسی ایشنز فورم (اے پی ای اے ایف) نے وزیراعظم شہباز شریف کے برآمدی صنعتوں کی کارکردگی سے متعلق ری مارکس پر اپنے سابقہ مؤقف کی وضاحت کرتے ہوئے کہا ہے کہ وہ برآمدات میں اضافے پر وزیراعظم کی توجہ کو سراہتے ہیں۔

فورم کے مطابق عالمی منڈی میں پاکستان کی مسابقت بہتر بنانے کے لیے حکومت اور صنعت کے درمیان مسلسل مشاورت ضروری ہے۔

فورم کے چیف کوآرڈینیٹر محمد جاوید بِلوانی نے کہا کہ میڈیا کوریج سے یہ تاثر پیدا ہوا کہ پاکستان کی پوری برآمدی صنعت برآمدات بڑھانے میں ناکام رہی، جو ملکی برآمدی شعبے کی مجموعی کارکردگی کی درست عکاسی نہیں کرتا۔

انہوں نے واضح کیا کہ وزیراعظم کے ریمارکس بعض مخصوص برآمدی صنعتوں کی کمزور کارکردگی سے متعلق تھے۔

جاوید بِلوانی نے کہا کہ قومی برآمدات 2015-16 میں 20.79 ارب ڈالر سے بڑھ کر 2025-26 میں 30.14 ارب ڈالر ہوگئیں، جو 45 فیصد اضافہ ہے۔ انہوں نے کہا کہ برآمدات ملکی زرمبادلہ کے حصول میں اہم کردار ادا کرتی ہیں۔

انہوں نے حکومت کی جانب سے کاروباری برادری سے براہِ راست رابطے، کراچی میں ایف بی آر ٹیموں کے دوروں اور پی آر اے ایل دفتر کے قیام کو مثبت اقدامات قرار دیا۔ تاہم کاروباری لاگت، توانائی کے نرخ، ٹیکس، ریفنڈز، برآمدی فنانس، لاجسٹکس، کسٹمز اور کاروبار میں آسانی جیسے مسائل فوری توجہ کے متقاضی ہیں۔

فورم نے کہا کہ برآمدات بڑھانا حکومت اور نجی شعبے کی مشترکہ قومی ذمہ داری ہے۔ ایکسپورٹرز حکومت کے ساتھ مل کر برآمدات، سرمایہ کاری، روزگار اور معاشی استحکام میں اپنا کردار ادا کرنے کے لیے تیار ہیں۔