بینکاک سیلاب کے باعث آفت زدہ علاقہ قرار

تھائی لینڈ کے دارالحکومت بینکاک کے گورنر نے ہفتے کو شدید بارشوں کے باعث بڑے پیمانے پر سیلاب آنے کے بعد شہر کو آفت زدہ علاقہ قرار دے دیا جبکہ محکمہ موسمیات نے ہفتے کے اختتام پر گرج چمک کے ساتھ بارش کی پیش گوئی کی ہے۔

تقریباً 48 گھنٹوں کے دوران 300 ملی میٹر (12 انچ) کے قریب بارش ہونے کے بعد اہم شاہراہیں زیرِ آب آگئیں، گاڑیاں جزوی طور پر پانی میں ڈوب گئیں جبکہ لوگوں کو کمر تک آنے والے پانی میں چلنے پر مجبور ہونا پڑا۔

بینکاک کے گورنر چڈچارت سِتِپُنٹ نے کہا کہ یہ بحران لوگوں کی زندگیوں کے لیے خطرہ بن سکتا ہے اور سرکاری و نجی املاک کو نقصان پہنچا سکتا ہے، جبکہ نہروں کے قریب صورتحال سب سے زیادہ سنگین ہے۔

فوج نے کہا کہ وہ دیگر امدادی سرگرمیوں کے علاوہ عارضی پناہ گاہیں اور فیلڈ کچن قائم کر رہی ہے جبکہ بینکاک میٹروپولیٹن ایڈمنسٹریشن نے اسکولوں کو عارضی رہائش گاہوں کے طور پر مختص کردیا ہے اور شہریوں سے غیر ضروری سفر سے گریز کرنے کی اپیل کی ہے۔

سپر مارکیٹوں میں اشیائے ضروریہ ذخیرہ کرنے والے لوگوں کا رش لگ گیا۔

19 سالہ سانسک لاؤواچراکل نے کہا کہ مجھے بھی تشویش ہے کیونکہ میں نے پہلے سے کھانے پینے کی اشیا ذخیرہ نہیں کیں اور اس سے پہلے مجھے کبھی ایسی صورتحال کا اکیلے سامنا نہیں کرنا پڑا، کیونکہ میرے والدین میرے ساتھ نہیں ہیں۔