یورپی فٹبال یونین نے فیفا کی گورننس خامیاں بے نقاب کردیں

یورپی فٹبالرز کی یونین فیف پرو یورپ نے فیفا کے فیصلہ سازی کے نظام میں اصلاحات کا مطالبہ کرتے ہوئے کہا کہ عالمی فٹبال کی گورننس میں سنگین خامیاں موجود ہیں۔

یونین کے مطابق فیفا کا اب ترک کیا جاچکا فارورڈ انٹرپرائز منصوبہ اہم فریقین سے مناسب مشاورت کے بغیر کھیل کے بڑے مقابلوں کو نجی سرمایہ کاری کے اثاثوں میں تبدیل کرنے کا باعث بن سکتا تھا۔

رپورٹ کے مطابق فیفا کے صدر جیانی انفینٹینو نے رواں سال کے آغاز میں یہ منصوبہ پیش کیا تھا، تاہم شدید مخالفت کے بعد اسے واپس لے لیا گیا۔ فیف پرو یورپ نے کہا کہ منصوبے کو ممکن بنانے والی فیصلہ سازی کی خامیاں اب بھی برقرار ہیں۔

یونین نے چھوٹی فیڈریشنز کے لیے ترقیاتی فنڈنگ بڑھانے کی حمایت کی مگر زور دیا کہ اس حوالے سے کوئی بھی اقدام تمام متعلقہ فریقوں کی مشاورت سے ہونا چاہیے۔

رپورٹ کے مطابق 2026 ورلڈ کپ میں یورپی کلبوں سے وابستہ 856 کھلاڑی شریک ہوئے، جن کی مجموعی مالیت 16.9 ارب یورو تھی، جو ٹورنامنٹ کی کل کھلاڑی مالیت کا 94 فیصد ہے۔ گزشتہ پانچ ورلڈ کپ کے تمام 20 انفرادی ایوارڈز جیتنے والے کھلاڑی بھی یورپی کلبوں سے وابستہ تھے۔

فیف پرو یورپ نے فیفا کونسل کے انتظامی فیصلوں کے آزادانہ جائزے کا مطالبہ کیا۔