پاکستان کی جانب سے سیلاب سے متاثرہ نیپال کو 100 ٹن امداد روانہ

پاکستان نے تباہ کن سیلاب اور لینڈ سلائیڈنگ کے بعد امدادی سرگرمیوں میں معاونت کے لیے سیلاب سے متاثرہ نیپال کو 100 ٹن انسانی امداد روانہ کر دی ہے۔ دفتر خارجہ نے بتایا کہ امدادی سامان وزیر اعظم شہباز شریف کی ہدایت پر اسلام آباد سے کھٹمنڈو کے لیے چارٹرڈ پرواز کے ذریعے روانہ کیا گیا۔

نیشنل ڈیزاسٹر مینجمنٹ اتھارٹی (این ڈی ایم اے) کی جانب سے مربوط کی جانے والی اس امداد میں متاثرہ علاقوں کے لوگوں کے لیے خیمے، کمبل، چٹائیاں، حفظانِ صحت کی کٹس اور ادویات شامل ہیں۔

اسلام آباد انٹرنیشنل ایئرپورٹ پر امدادی سامان روانہ کرنے کی تقریب منعقد ہوئی، جس میں وفاقی وزیر برائے پارلیمانی امور ڈاکٹر طارق فضل چوہدری اور این ڈی ایم اے کے چیئرمین لیفٹیننٹ جنرل انعام حیدر ملک نے شرکت کی۔

پاکستان میں نیپال کے سفیر کے علاوہ دفتر خارجہ، این ڈی ایم اے اور انسانی امداد فراہم کرنے والی تنظیموں کے اعلیٰ حکام بھی تقریب میں شریک ہوئے۔

اس موقع پر ڈاکٹر طارق فضل چوہدری نے حکومت اور پاکستان کے عوام کی جانب سے نیپال کے عوام کے ساتھ یکجہتی کا اظہار کیا۔

انہوں نے کہا پاکستان اس مشکل وقت میں نیپال اور سیلاب سے متاثرہ عوام کے ساتھ کھڑا ہے۔

وفاقی وزیر نے کہا کہ امدادی سامان بروقت روانہ کرنا قدرتی آفات کا سامنا کرنے والے ممالک کو انسانی امداد فراہم کرنے کے لیے پاکستان کے عزم کی عکاسی کرتا ہے۔

دفتر خارجہ نے کہا کہ یہ امداد حکومت اور نیپال کے عوام کے ساتھ پاکستان کی یکجہتی کا اظہار ہے۔

این ڈی ایم اے کے مطابق متاثرہ آبادی کو بروقت مدد فراہم کرنے کے لیے اس کی مربوط کوششوں کے تحت امدادی سامان روانہ کیا گیا ہے۔