فیلڈ مارشل عاصم منیر کی ہارورڈ طلبہ سے ملاقات، تعلیم اور کاروباری سرگرمیوں کی اہمیت پر زور

انٹر سروسز پبلک ریلیشنز (آئی ایس پی آر) نے کہا ہے کہ چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے پاکستان کے دورے پر آئے ہوئے مختلف ممالک سے تعلق رکھنے والے ہارورڈ بزنس اسکول کے طلبہ کے ایک وفد سے ملاقات کی۔

ملاقات کے دوران علاقائی اور عالمی صورتحال، پاکستان کی سکیورٹی صورتحال اور خطے اور اس سے باہر امن، استحکام اور خوشحالی کے فروغ کے لیے پاکستان کی کوششوں پر تبادلہ خیال کیا گیا۔

فیلڈ مارشل عاصم منیر نے تعلیم، مہارتوں کی ترقی اور کاروباری سرگرمیوں کی اہمیت پر زور دیتے ہوئے کہا کہ نوجوانوں کو ایک ایسے ماحول میں جو تیزی سے غیر یقینی اور اتار چڑھاؤ کا شکار ہورہا ہے، بامعنی کردار ادا کرنے کے لیے حقائق پر مبنی تجزیے کو بروئے کار لانا چاہیے۔

انہوں نے غلط معلومات، سوشل میڈیا اور پروپیگنڈے سے پیدا ہونے والے چیلنجز کو بھی اجاگر کیا۔

ہارورڈ بزنس اسکول کے طلبہ نے پاکستان کے اپنے جاری دورے کے تجربات سے آگاہ کیا اور پاکستانی عوام کی کشادہ دلی اور گرمجوشی کو سراہا۔

طلبہ نے پاکستان کی زبردست صلاحیت اور ملک کی جانب سے فراہم کیے جانے والے مواقع کو بھی اجاگر کیا۔