سعودی اسیاد گروپ کی پاکستان کے ہوائی اڈوں کی نجکاری میں دلچسپی

سعودی عرب کے اَسیاد گروپ نے پاکستان میں ہونے والی آئندہ ہوائی اڈوں کی نجکاری کے عمل میں دلچسپی ظاہر کی ہے، جبکہ گروپ ممکنہ بولیوں کے لیے متعلقہ تکنیکی مہارت رکھنے والے سعودی اور بین الاقوامی شراکت داروں کو ساتھ لانے کے لیے کام کر رہا ہے۔

یہ پیش رفت وفاقی وزیر خزانہ و محصولات سینیٹر محمد اورنگزیب اور سعودی عرب کے اَسیاد گروپ کے چیف ایگزیکٹو آفیسر اور وافی انرجی پاکستان لمیٹڈ کے بورڈ آف ڈائریکٹرز کے چیئرپرسن غسان احمد العمودی کے درمیان ملاقات میں سامنے آئی۔

ملاقات میں اَسیاد گروپ کے گروپ چیف فنانشل آفیسر اور وافی انرجی پاکستان لمیٹڈ کے بورڈ ممبر جاوید اختر، وافی انرجی پاکستان لمیٹڈ کے چیف ایگزیکٹو آفیسر زبیر شیخ اور کارپوریٹ و حکومتی تعلقات کے ڈائریکٹر عمران حسین قریشی بھی موجود تھے۔

ملاقات میں پاکستان میں گروپ کے موجودہ سرمایہ کاری پورٹ فولیو، مزید توسیع کے منصوبوں اور اہم شعبوں میں نئی سرمایہ کاری کے مواقع پر تبادلہ خیال کیا گیا، جن میں حکومت کی وسیع تر نجکاری مہم سے پیدا ہونے والے مواقع بھی شامل ہیں۔

غسان احمد العمودی نے پاکستان کو طویل مدتی سرمایہ کاری کی منزل بنانے کے عزم کا اعادہ کرتے ہوئے ملک میں اپنے تجربے پر اطمینان کا اظہار کیا۔

انہوں نے سعودی عرب سے باہر گروپ کے سرمایہ کاری پورٹ فولیو میں پاکستان کی اہمیت اجاگر کی اور ملک میں اپنی موجودگی مزید بڑھانے کے منصوبوں سے آگاہ کیا۔

العمودی نے وزیر خزانہ کو آئندہ ہوائی اڈوں کی نجکاری کے عمل میں شرکت کے لیے اَسیاد گروپ کی دلچسپی اور متعلقہ تکنیکی مہارت رکھنے والے سعودی و بین الاقوامی شراکت داروں کو ساتھ ملانے کی کوششوں سے آگاہ کیا۔ انہوں نے گروپ کے ہوائی اڈوں کے آپریشنز میں حالیہ پیش رفت اور اس شعبے میں بڑھتے ہوئے بین الاقوامی تجربے سے بھی آگاہ کیا۔

پاکستانی حکومت نے تین بڑے ہوائی اڈوں، جناح انٹرنیشنل کراچی، اسلام آباد انٹرنیشنل اور علامہ اقبال انٹرنیشنل لاہور کے آپریشنز اور اراضی اثاثوں کو آؤٹ سورس کرنے کا عمل شروع کیا ہے۔اس اقدام کا بنیادی مقصد مسافروں کی خدمات بہتر، سہولیات کو جدید بنانا، آمدن کے امکانات کو بہتر طور پر بروئے کار لانا اور پبلک پرائیویٹ پارٹنرشپ کے ذریعے غیر ملکی سرمایہ کاری راغب کرنا ہے۔

وزیر خزانہ نے پاکستان میں سعودی سرمایہ کاروں کی مسلسل دلچسپی کا خیرمقدم کیا اور جاری نجکاری کے عمل کے ذریعے پیدا ہونے والے نئے مواقع کو اجاگر کیا۔

انہوں نے قابلِ اعتماد اور طویل مدتی سرمایہ کاروں کو راغب کرنے اور اہم شعبوں میں تجارتی طور پر قابلِ عمل سرمایہ کاری کو سہولت فراہم کرنے کی اہمیت پر زور دیا۔ انہوں نے سرمایہ کاری، تجارت اور معاشی تعاون کے فروغ کے لیے سعودی عرب اور نجی شعبے کے ساتھ کثیرالجہتی روابط کی اہمیت بھی اجاگر کی۔

ملاقات میں وافی انرجی پاکستان لمیٹڈ کی جاری توسیع اور سرمایہ کاری کے منصوبوں پر بھی تبادلہ خیال کیا گیا، جن میں ریٹیل نیٹ ورک، ذخیرہ کرنے کے بنیادی ڈھانچے اور ڈیجیٹلائزیشن کے اقدامات میں توسیع شامل ہے۔

کمپنی نے وزیر خزانہ کو خیبر پختونخوا اور ملک کے دیگر علاقوں میں اپنی سرمایہ کاری اور آپریشنز مزید وسعت دینے کے منصوبوں سے آگاہ کیا۔

العمودی نے پاکستان میں مزید سرمایہ کاری کے مواقع تلاش کرنے میں گروپ کی دلچسپی سے بھی آگاہ کیا، جن میں مالیاتی شعبہ شامل ہے۔ انہوں نے ممکنہ منصوبوں کے لیے مزید سعودی اور پاکستانی سرمایہ کاروں کو ایک دوسرے کے قریب لانے کے امکانات کا بھی ذکر کیا۔

محمد اورنگزیب نے پاکستان میں معاشی استحکام کی جانب پیش رفت کو اجاگر کیا، جس میں اہم معاشی اشاریوں اور ملک کی خودمختار کریڈٹ پروفائل میں بہتری بھی شامل ہے۔

وزیر خزانہ نے پاکستان پر اَسیاد گروپ کے مسلسل اعتماد اور سرمایہ کاری بڑھانے کے عزم کو سراہا۔ انہوں نے یقین دلایا کہ حکومت سرمایہ کاروں کو سہولت فراہم کرنے، نجی شعبے کی شمولیت بڑھانے اور سرمایہ کاری پر مبنی معاشی نمو کو فروغ دینے کی کوششوں کی حمایت جاری رکھے گی۔

محمد اورنگزیب نے پاکستان کے اسٹریٹیجک محل وقوع اور علاقائی منڈیوں کے لیے گیٹ وے کے طور پر اس کی صلاحیت کو بھی اجاگر کیا۔ انہوں نے نجی شعبے کے ساتھ تعاون جاری رکھنے پر زور دیا، تاکہ قابلِ عمل مواقع کی نشاندہی اور سرمایہ کاری کی دلچسپی کو ٹھوس منصوبوں میں تبدیل کیا جاسکے۔

العمودی نے حکومت کی جانب سے مسلسل رابطے اور تعاون کو سراہتے ہوئے پاکستان میں مزید سرمایہ کاری کے لیے اَسیاد گروپ کے عزم کا اعادہ کیا اور پاکستان اور سعودی عرب کے درمیان دیرینہ اقتصادی و تجارتی شراکت داری کو مزید مضبوط بنانے کے عزم کا اظہار کیا۔