وزارتِ بحری امور کے ماتحت تمام اداروں کا فوری فائر سیفٹی آڈٹ کرانے کا حکم

وفاقی وزیر برائے بحری امور جنید انور چوہدری نے جمعرات کو پاکستان انسٹیٹیوٹ آف میڈیکل سائنسز (پمز) میں حالیہ آتشزدگی کے واقعے پر افسوس کا اظہار کرتے ہوئے وزارتِ بحری امور کے ماتحت تمام اداروں کا فوری فائر سیفٹی آڈٹ کرانے کا حکم دے دیا۔

وفاقی وزیر نے ایک بیان میں کہا کہ تمام ادارے 15 روز کے اندر اپنی ہر عمارت کی فائر سیفٹی آڈٹ رپورٹ جمع کرائیں۔

جنید انور چوہدری نے کہا کہ دفاتر، اسپتالوں، رہائشی عمارتوں اور گوداموں کے فائر سیفٹی آڈٹ کرائے جائیں گے۔ کراچی پورٹ ٹرسٹ اسپتال کے فائر سیفٹی آڈٹ کو خصوصی ترجیح دی جائے۔

یہ ہدایات ایسے وقت میں سامنے آئی ہیں جب بدھ کو پاکستان انسٹی ٹیوٹ آف میڈیکل سائنسز (پمز) اسپتال میں آگ لگنے کے نتیجے میں کم از کم 14 شیر خوار بچے جاں بحق ہوگئے تھے۔

ریسکیو ذرائع کے مطابق نرسری کے اندر ایئر کنڈیشنر کا کمپریسر پھٹنے کے بعد آگ بھڑکی۔

دریں اثنا اداروں کے سربراہان کے نام جاری کیے گئے خط کے مطابق وزارت کے ماتحت تمام اداروں اور محکموں کے سربراہان کو ہدایت کی جاتی ہے کہ وہ اپنے متعلقہ زیرِ انتظام تمام عمارتوں اور مقامات کا فوری طور پر جامع فائر سیفٹی آڈٹ کرائیں جس میں دفاتر، اسپتال، رہائشی عمارتیں، ورکشاپس، گودام، آئل پیئرز اور دیگر سہولیات شامل ہیں۔ اس عمل میں کے پی ٹی اسپتال کو خصوصی ترجیح دی جائے۔

آڈٹ میں درج ذیل امور کا جائزہ لیا جائے گا:

• فائر ایکسٹنگوشرز، فائر الارمز، دھوئیں کا پتا لگانے والے آلات، ہائیڈرنٹس، اسپرنکلرز اور دیگر فائر فائٹنگ آلات کی دستیابی، فعالیت اور دیکھ بھال کا جائزہ لیا جائے گا۔

• بجلی کی وائرنگ، ڈسٹری بیوشن سسٹمز، جنریٹرز، یو پی ایس سسٹمز اور آگ لگنے کے دیگر ممکنہ خطرات کی صورتحال کا جائزہ لیا جائے گا۔

• ہنگامی راستوں، انخلا کے راستوں، سیڑھیوں اور فائر ایگزٹس کی دستیابی اور رسائی کا جائزہ لیا جائے، اس امر کو یقینی بنایا جائے کہ یہ راستے واضح طور پر نشان زد ہوں اور کسی بھی قسم کی رکاوٹ سے پاک رہیں۔

• ہنگامی روشنی، رہنمائی کے سائن بورڈز اور انخلا کے انتظامات کی موزونیت کا جائزہ لیا جائے گا۔

• فائر انخلا اور ہنگامی ردعمل کے منصوبوں کی دستیابی کا جائزہ لیا جائے گا۔