پاکستان کی بنگلہ دیش کو قانونی اصلاحات، ڈیجیٹل نظامِ انصاف میں تعاون کی پیشکش

پاکستان نے دوطرفہ اور ادارہ جاتی تعلقات مزید مستحکم کرنے کی کوششوں کے تحت بنگلہ دیش کو قانونی اصلاحات اور نظامِ انصاف کی ڈیجیٹلائزیشن کے شعبوں میں تعاون اور تکنیکی معاونت کی پیشکش کی ہے۔

وزارت قانون و انصاف کی جانب سے پیر کو جاری بیان کے مطابق یہ پیشکش وفاقی وزیر قانون و انصاف سینیٹر اعظم نذیر تارڑ نے اسلام آباد میں پاکستان میں بنگلہ دیش کے ہائی کمشنر محمد اقبال حسین خان سے ملاقات کے دوران کی۔

ملاقات میں دوطرفہ تعلقات، قانونی و عدالتی تعاون، ثالثی و مفاہمت کے طریقہ کار اور باہمی دلچسپی کے دیگر امور پر تبادلہ خیال کیا گیا۔ دونوں جانب سے پاکستان اور بنگلہ دیش کے تعلقات میں حالیہ مثبت پیش رفت پر اطمینان کا اظہار کرتے ہوئے دوطرفہ روابط مزید مستحکم کرنے پر اتفاق کیا گیا۔

اعظم نذیر تارڑ نے کہا کہ دونوں ممالک قانونی اصلاحات، جدید ٹیکنالوجی اور نظامِ انصاف کی ڈیجیٹلائزیشن کے شعبوں میں ایک دوسرے کے تجربات سے فائدہ اٹھا سکتے ہیں۔ انہوں نے کہا کہ پاکستان ان شعبوں میں اپنی مہارت اور تجربات شیئر کرنے کے لیے تیار ہے۔

بنگلہ دیشی ہائی کمشنر نے انٹرنیشنل میڈی ایشن اینڈ آربیٹریشن سینٹر میں بنگلہ دیشی ججز کی تربیت میں پاکستان کی سہولت کاری پر شکریہ ادا کیا اور ثالثی و مفاہمتی پروگراموں میں وزارت کے تعاون کو سراہا۔

دونوں فریقوں نے عوامی سطح پر روابط اور ادارہ جاتی رابطوں میں اضافے کا بھی خیرمقدم کیا اور قانونی و عدالتی شعبوں میں تعاون مزید وسعت دینے کے عزم کا اعادہ کیا۔