ایس ای سی پی نے وینچر کیپیٹل بل کا مسودہ بورڈ آف انویسٹمنٹ کو ارسال کردیا

سیکیورٹیز اینڈ ایکسچینج کمیشن آف پاکستان (ایس ای سی پی) نے وینچر کیپٹل بل کا مسودہ مشاورت کے لیے بورڈ آف انویسٹمنٹ (بی او آئی) کو ارسال کردیا۔

پیر کو جاری بیان کے مطابق مجوزہ قانون سازی کا مقصد پاکستان میں اسٹارٹ اپس اور ٹیکنالوجی کمپنیوں کے لیے سرمایہ کاری کے مواقع میں اضافہ کرنا ہے۔

ایس ای سی پی کے مطابق ملک میں اسٹارٹ اپس اور ٹیک کمپنیوں کے لیے وینچر کیپیٹل تک باضابطہ رسائی اب تک محدود رہی ہے۔

بیان کے مطابق مجوزہ قانون کا مقصد مقامی اسٹارٹ اپس کو وینچر کیپٹل کے ذریعے سرمایہ کاری تک زیادہ رسائی فراہم کرنا ہے۔

ایس ای سی پی نے کہا کہ مجوزہ قانون کے مسودے میں وینچر کیپیٹل فنڈز اور فنڈ منیجرز کے لیے سادہ ضابطہ جاتی فریم ورک کے ساتھ ساتھ وینچر کیپیٹل فنڈز کے لیے آسان لائسنسنگ اور رجسٹریشن کا نظام تجویز کیا گیا ہے۔

مجوزہ قانون وینچر کیپٹل کی سرگرمیوں کو بھی باقاعدہ مالی نظام کا حصہ بنائے گا جس سے اسٹارٹ اپس کی ترقی، نئی سرمایہ کاری کے حصول اور روزگار کے مواقع پیدا کرنے میں مدد ملے گی۔

ایس ای سی پی کے چیئرمین ڈاکٹر کبیر سدھو نے کہا کہ ابھرتے ہوئے اسٹارٹ اپس کی ترقی کے لیے وینچر کیپٹل کی دستیابی انتہائی ضروری ہے۔

ایس ای سی پی اور بورڈ آف انویسٹمنٹ وینچر کیپٹل بل پر اسٹیک ہولڈرز سے عوامی مشاورت کریں گے۔

مشاورتی عمل مکمل ہونے کے بعد بل قانون سازی کے لیے حکومت کو بھجوا دیا جائے گا۔