پاکستان کا بھارت میں امریکی سفیر کے کشمیر سے متعلق تبصرے پر امریکا کو ڈیمارش

پاکستان نے بدھ کو اسلام آباد میں امریکی ناظم الامور کو طلب کرکے بھارت میں امریکی سفیر سرجیو گور کے مقبوضہ جموں و کشمیر کی حیثیت سے متعلق ’’حقائق کے منافی‘‘ بیان پر شدید احتجاج کرتے ہوئے ڈیمارش جاری کیا۔

دفتر خارجہ کے مطابق امریکی سفارت کار کو گور کے غیر قانونی طور پر بھارتی مقبوضہ جموں و کشمیر کے دورے کے دوران دیے گئے بیان پر وزارت خارجہ طلب کیا گیا۔

پاکستان نے ’’مقبوضہ جموں و کشمیر‘‘ کو ’’بھارت کا حصہ‘‘ قرار دینے کی سخت مذمت کرتے ہوئے اسے دوٹوک الفاظ میں مسترد کردیا۔ پاکستان نے واضح کیا کہ یہ خطہ عالمی سطح پر تسلیم شدہ متنازع علاقہ ہے، جس کے حتمی تصفیے کا فیصلہ اقوام متحدہ کی سلامتی کونسل کی متعلقہ قراردادوں اور کشمیری عوام کی امنگوں کے مطابق ہونا باقی ہے۔

دفتر خارجہ نے کہا کہ امریکی سفیر کا بیان جموں و کشمیر کے تنازع پر امریکا کے دیرینہ اور دستاویزی مؤقف کی نفی کرتا ہے اور واشنگٹن کی بین الاقوامی قانون اور اقوام متحدہ کے منشور سے وابستگی سے بھی متصادم ہے۔

پاکستان نے معرکۂ حق کے بعد جموں و کشمیر کے تنازع کے حل کے لیے پاکستان اور بھارت کے درمیان ثالثی کی امریکی صدر ڈونلڈ ٹرمپ کی پیشکش کو سراہتے ہوئے امریکی فریق پر زور دیا کہ وہ اس امر کو یقینی بنائے کہ اس کے عوامی بیانات جموں و کشمیر کی متنازع حیثیت کے مطابق ہوں۔

پاکستان نے بدھ کو اسلام آباد میں امریکی ناظم الامور کو یہ ڈیمارش پہنچایا۔