سی سی پی نے سی وی سی فنڈ 9 کو ڈی ایس ایم فِرمنِش کے اینیمل نیوٹریشن کاروبار کے حصول کی منظوری دے دی

کمپیٹیشن کمیشن آف پاکستان (سی سی پی) نے سی وی سی فنڈ 9 کی بالواسطہ ملکیت اور مالی معاونت رکھنے والی چار انویسٹمنٹ وہیکلز کو ڈی ایس ایم فِرمنِش کے اینیمل نیوٹریشن اینڈ ہیلتھ بزنس میں کنٹرولنگ ایکویٹی حصص حاصل کرنے کی منظوری دے دی ہے۔

سی سی پی نے منگل کو جاری بیان میں کہا کہ اس ٹرانزیکشن کی منظوری کمپیٹیشن ایکٹ 2010 کی دفعہ 11 کے تحت پہلے مرحلے کی مسابقتی جانچ کے بعد دی گئی۔

ڈی ایس ایم کا اینیمل نیوٹریشن اینڈ ہیلتھ بزنس پاکستان میں ڈی ایس ایم فِرمنِش پاکستان پرائیویٹ لمیٹڈ کے ذریعے کام کرتا ہے۔ ٹرانزیکشن کے تحت نیدرلینڈز میں قائم ڈی ایس ایم بی وی، جو سوئٹزرلینڈ میں قائم ڈی ایس ایم فِرمنِش اے جی کی مکمل ملکیتی ذیلی کمپنی ہے، اس کاروبار کو دو اداروں، اسپیشلٹی کو بزنس اور ایسینشل کو بزنس، میں تقسیم کرے گی۔

ڈی ایس ایم فِرمنِش گروپ دونوں اداروں میں نان کنٹرولنگ ایکویٹی حصص برقرار رکھے گا، جبکہ سی وی سی کی حمایت یافتہ خریدار کمپنیوں کو کنٹرولنگ ایکویٹی حصص اور متعلقہ ووٹنگ حقوق حاصل ہوں گے۔

خریدار کمپنیوں میں نیدرلینڈز میں قائم اسپیشلٹی بِڈکو بی وی اور ایسینشل بِڈکو بی وی جبکہ امریکا کی ریاست ڈیلاویئر میں قائم اسپیشلٹی (یو ایس) بِڈکو انک اور ایسینشل (یو ایس) بِڈکو انک شامل ہیں۔ یہ چاروں انویسٹمنٹ وہیکلز بالواسطہ طور پر سی وی سی فنڈ 9 کی ملکیت اور مالی معاونت رکھتی ہیں، جس کا انتظام اور مشاورتی خدمات سی وی سی کیپیٹل پارٹنرز پی ایل سی سے وابستہ ادارے انجام دیتے ہیں۔

اینیمل نیوٹریشن اینڈ ہیلتھ بزنس جانوروں کی خوراک کے لیے غذائی اجزا تیار کرتا ہے، جن میں وٹامنز اور کیروٹینائڈز، پرفارمنس سلوشنز، پری مکسز، پریسیژن سروسز اور اروما اجزا شامل ہیں۔

سی سی پی کے مطابق اس کی جانچ سے معلوم ہوا کہ سی وی سی فنڈ 9، خریدار ادارے اور ان کے زیرِ کنٹرول پورٹ فولیو کی کمپنیاں پاکستان میں ان متعلقہ مصنوعات کی کسی بھی مارکیٹ میں فعال نہیں ہیں جہاں ڈی ایس ایم کا کاروبار موجود ہے۔

کمیشن نے کہا کہ نتیجتاً اس ٹرانزیکشن سے نہ تو افقی سطح پر کاروباری اوورلیپ پیدا ہوگا اور نہ عمودی تعلق، جبکہ پاکستان میں مارکیٹ شیئر یا مارکیٹ کا ارتکاز بھی نہیں بڑھے گا۔

سی سی پی نے نتیجہ اخذ کیا کہ اس حصول سے متعلقہ مارکیٹوں میں نئی کمپنیوں کے داخلے کی راہ میں رکاوٹیں پیدا ہونے، مارکیٹ پاور میں نمایاں اضافے یا مسابقت میں خاطر خواہ کمی کا امکان نہیں ہے۔

چنانچہ کمیشن نے کمپیٹیشن ایکٹ 2010 کے تحت ٹرانزیکشن کی منظوری دے دی۔

کمیشن نے کہا کہ وہ سرمایہ کاری میں سہولت فراہم کرنے، کاروباری ترقی کی حمایت اور پاکستان میں مسابقتی و سرمایہ کار دوست کاروباری ماحول کے فروغ کے لیے بدستور پُرعزم ہے۔