کوہِ نور ٹیکسٹائل کا 48 میگاواٹ بیٹری اسٹوریج سسٹم نصب کرنے کا فیصلہ، 9.34 میگاواٹ سولر پلانٹ بھی لگائے گی

کوہ نور ٹیکسٹائل ملز لمیٹڈ نے منگل کو اعلان کیا ہے کہ اس نے 48.36 میگا واٹ کے بیٹری انرجی سٹوریج سسٹم (بی ای ایس ایس) کی تنصیب کی منظوری دے دی ہے جس کے ساتھ 9.34 میگا واٹ کا اضافی سولر پاور پلانٹ بھی لگایا جائے گا۔

کمپنی نے آج پاکستان اسٹاک ایکسچینج (پی ایس ایکس) کو ایک نوٹس کے ذریعے اس پیش رفت سے آگاہ کیا۔

کمپنی نے بتایا کہ بیٹری انرجی اسٹوریج سسٹم کی تنصیب مکمل ہونے کے بعد مالی سال 2026-27 کی دوسری سہ ماہی کے آخری ماہ میں اس کے کمرشل آپریشنز شروع ہونے کی توقع ہے۔

کمپنی نے کہا کہ یہ اسٹریٹجک سرمایہ کاری آپریشنل کارکردگی، پائیداری اور اپنے اسٹیک ہولڈرز کے لیے طویل مدتی قدر کی تخلیق کے سلسلے میں کمپنی کے پختہ عزم کی عکاسی کرتی ہے اور اس سے توانائی کے اخراجات میں نمایاں بچت متوقع ہے۔

بی ای ایس ایس میں ری چارج ہونے والی بیٹریاں استعمال کی جاتی ہیں جو بجلی ذخیرہ کرتی ہیں جس سے توانائی کے مؤثر انتظام، گرڈ کے استحکام اور قابلِ تجدید توانائی کے ذرائع کے زیادہ سے زیادہ انضمام میں مدد ملتی ہے۔

یہ ٹیکنالوجی جدید انرجی انفرااسٹرکچر کا ایک اہم ترین جزو کے طور پر ابھر رہی ہے۔

کوہ نور ٹیکسٹائل ملز لمیٹڈ پاکستان میں کمپنیز ایکٹ 1913 کے تحت رجسٹرڈ ایک پبلک لمیٹڈ کمپنی ہے۔

کمپنی کی بنیادی سرگرمی یارن اور کپڑے کی تیاری، کپڑے کی پروسیسنگ اور سلائی اور ٹیکسٹائل کی مصنوعات کی تجارت ہے۔