پنجگور میں آپریشن، فتنۃ الہندوستان کے کمانڈر سمیت 5 دہشت گرد ہلاک

سرکاری میڈیا پی ٹی وی نیوز نے پیر کو سیکیورٹی ذرائع کے حوالے سے رپورٹ کیا کہ بلوچستان کے ضلع پنجگور میں انٹیلی جنس پر مبنی آپریشن کے دوران سیکیورٹی فورسز نے فتنہ الہندستان کے ایک اہم کمانڈر سمیت پانچ دہشت گردوں کو ہلاک کر دیا ہے۔

ذرائع کے مطابق یہ کارروائی جاری آپریشن ردالفتنہ 3 کے تحت پنجگور کے علاقوں سرکانی اور چیڈگی میں کی گئی۔

ذرائع نے بتایا کہ ہلاک ہونے والوں میں فتنۃ الہندوستان کا اہم کمانڈر وزیر بھی شامل ہے۔

کارروائی کے دوران ہلاک دہشت گردوں کے قبضے سے 4 موٹر سائیکلیں، مشین گنز، بھاری ہتھیار اور گولہ بارود بھی برآمد کیا گیا۔

سیکیورٹی ذرائع کے مطابق ہلاک دہشت گرد پنجگور میں مقامی تاجروں اور شہریوں کو نشانہ بنانے والی ڈکیتیوں، بھتہ خوری، اغوا اور دیگر دہشت گردانہ سرگرمیوں میں ملوث تھے۔

سیکیورٹی فورسز بلوچستان میں امن و سلامتی برقرار رکھنے کی کوششوں کے تحت علاقے میں دہشت گرد عناصر کے خلاف کارروائیاں جاری رکھے ہوئے ہیں۔

حکومت نے مارچ 2025 میں فیصلہ کیا تھا کہ بلوچستان میں سرگرم تمام دہشت گرد گروہوں اور تنظیموں کو فتنۃ الہندوستان کے نام سے پکارا جائے گا۔

وزارت داخلہ کی جانب سے جاری نوٹیفکیشن کے مطابق یہ فیصلہ بلوچستان میں بعض تنظیموں اور گروہوں کی دہشت گرد سرگرمیوں میں ملوث ہونے اور بھارت (ہندوستان) کی ایما پر کارروائیاں کرنے کے پیش نظر کیا گیا تھا۔

نوٹیفکیشن میں مزید کہا گیا تھا کہ نام کی تبدیلی کا مقصد ان دہشت گرد تنظیموں اور گروہوں کی حقیقی نوعیت اور نظریے کے ساتھ ساتھ پاکستان کے عوام کے خلاف بھارت (ہندوستان) کے مذموم عزائم کی عکاسی کرنا ہے۔

ایک روز قبل بھی سیکیورٹی فورسز نے مستونگ، بولان، واشک، آواران، سبی، خضدار، ہرنائی اور نوشکی میں خوارج کے خلاف انٹیلی جنس کی بنیاد پر کیے گئے آپریشنز کے دوران 15 دہشت گردوں کو ہلاک کیا تھا۔

کارروائیوں کے دوران کالعدم تنظیم تحریک طالبان پاکستان کے ارکان کے قبضے سے بھاری مقدار میں اسلحہ اور گولہ بارود بھی برآمد کیا گیا۔