تھائی اسکول فائرنگ کے ملزم نے آن لائن پرتشدد مواد دیکھا، پولیس

بینکاک کے قریب تھائی لینڈ میں ایک اسکول میں فائرنگ کے واقعے کے بعد پولیس نے بتایا ہے کہ حملہ آور 14 سالہ لڑکا تھا، جس نے واقعے سے قبل سوشل میڈیا پر اسلحہ چلانے کا طریقہ سیکھا اور پرتشدد مواد دیکھا تھا۔

پولیس کے مطابق لڑکے نے جمعہ کو پہلے گھر میں اپنے دادا دادی کو مبینہ طور پر گولی مار کر قتل کیا، جس کے بعد اسکول پہنچ کر مزید 6 افراد کو ہلاک کیا اور پھر خود کو بھی گولی مار لی۔ واقعے میں 20 سے زائد افراد زخمی بھی ہوئے۔

پولیس حکام کے مطابق لڑکے نے گزشتہ سال ایک ایئر گن اسکول لائی تھی جسے ایک استاد نے ضبط کرلیا تھا۔ جائے وقوعہ سے ایک آتشیں اسلحہ، استعمال شدہ کارتوس، چاقو اور ذاتی کمپیوٹر بھی ملا ہے۔

حکام نے بتایا کہ لڑکا 12 سال سے والدین کی علیحدگی کے بعد اپنے دادا دادی کے ساتھ رہ رہا تھا۔

وزارتِ تعلیم نے اسکولوں کی سیکیورٹی بہتر بنانے کے لیے آئندہ 3 ماہ میں نئے حفاظتی ضوابط متعارف کرانے کا اعلان کیا ہے، جن میں ذہنی صحت کی اسکریننگ، خطرے سے دوچار افراد کو ماہرین تک پہنچانے کا نظام، ہنگامی مشقیں، بدمعاشی کے خلاف اقدامات اور اسکولوں میں ممنوعہ اشیا کی روک تھام شامل ہیں۔