فیصل آباد الیکٹرک سپلائی کمپنی کی نجکاری: ترکیہ، چین اور پاکستانی کمپنیوں کی حصص لینے میں دلچسپی

نجکاری کمیشن (پی سی) کو فیصل آباد الیکٹرک سپلائی کمپنی (فیسکو) میں اکثریتی حصص کے حصول کے لیے مقامی اور غیر ملکی سرمایہ کاروں کی جانب سے 12 اظہارِ دلچسپی (ای او آئیز) موصول ہوئے ہیں، جس سے حکومت کے بجلی کی تقسیم کار کمپنیوں کی نجکاری کے منصوبے میں پیش رفت ہوئی ہے۔

وزیر خزانہ کے مشیر خرم شہزاد کے جمعہ کو جاری کردہ بیان کے مطابق، ممکنہ سرمایہ کاروں کی جانب سے درخواستیں جمع کرانے کی آخری تاریخ کو یہ اظہارِ دلچسپی موصول ہوئے۔ سرمایہ کار فیسکو کے 51 فیصد سے 100 فیصد تک حصص حاصل کرنے کے ساتھ ساتھ انتظامی کنٹرول بھی حاصل کرنے کے خواہاں ہیں۔

دلچسپی ظاہر کرنے والی جماعتوں میں ترکیہ کی تین، چین کی ایک اور پاکستان کی آٹھ کمپنیاں شامل ہیں۔

ترکیہ کی کمپنیوں میں اکتور الیکٹرک انرجی یاتیرملاری سان۔ وے تِک۔ اے۔شے، جینویرا انرجی اے۔شے (جیلیک گروپ) اور جنگیز انرجی سانائی وے تِجارت اے۔شے شامل ہیں، جبکہ چین کی جیانگ شی الیکٹرک پاور کنسٹرکشن نے بھی اظہارِ دلچسپی جمع کرایا ہے۔

پاکستانی سرمایہ کاروں میں اینگرو انرجی لمیٹڈ، سیفائر فائبرز لمیٹڈ، حب پاور ہولڈنگز اور لکی سیمنٹ کا کنسورشیم، شیرازی انویسٹمنٹس (اٹلس گروپ)، میپل لیف سیمنٹ اور کوہِ نور ٹیکسٹائل کا کنسورشیم، نشاط ملز لمیٹڈ اور پاک الیکٹرون لمیٹڈ (پی ای ایل) کا کنسورشیم، آرٹسٹک ملنرز (پرائیویٹ) لمیٹڈ اور کے الیکٹرک لمیٹڈ شامل ہیں۔

مجوزہ لین دین کے تحت فیسکو کے 51 فیصد سے 100 فیصد تک کنٹرولنگ حصص انتظامی کنٹرول سمیت فروخت کیے جائیں گے۔ یہ اقدام وفاقی حکومت کے وسیع تر نجکاری پروگرام کا حصہ ہے، جس کا مقصد سرکاری ملکیتی اداروں کی کارکردگی اور استعدادِ کار کو بہتر بنانا ہے۔