جے کے اسپننگ ملز نے قابل تجدید توانائی کے لیے 8 میگاواٹ سولر صلاحیت بڑھالی

جے کے اسپننگ ملز لمیٹڈ (جے کے ایس ایم) نے منگل کو اعلان کیا ہے کہ اس نے قابل تجدید توانائی کے استعمال کو بڑھاتے ہوئے اپنی سولر پاور پیدا کرنے کی صلاحیت میں 8 میگاواٹ کا اضافہ کر دیا ہے۔

کمپنی نے یہ اطلاع پاکستان اسٹاک ایکسچینج کو بھیجے گئے نوٹس میں دی۔

نوٹس میں کہا گیا کہ ہمیں یہ بتاتے ہوئے خوشی ہو رہی ہے کہ کمپنی نے شمسی توانائی پر انحصار بڑھا کر صاف اور قابل تجدید توانائی کے استعمال کو وسعت دینے کے عزم کا اظہار کیا ہے۔

جے کے اسپننگ ملز نے کہا کہ اس اقدام کا مقصد اپنے کاربن فٹ پرنٹ میں کمی لانا، ماحول دوست آپریشنز کو فروغ دینا اور زیادہ پائیدار مستقبل کے لیے کردار ادا کرنا ہے، جبکہ اس کے اسٹیک ہولڈرز کے لیے طویل مدتی قدر پیدا کرنا بھی شامل ہے۔

کمپنی کے مطابق 8 میگاواٹ سولر پاور پیدا کرنے کی صلاحیت کا اضافہ کیا گیا ہے، جو نہ صرف کمپنی کی توانائی کی ضروریات پوری کرنے میں مدد دے گا بلکہ ماحولیاتی آلودگی میں کمی کا باعث بھی بنے گا۔

کمپنی نے مزید کہا کہ یہ اسٹریٹجک سرمایہ کاری توانائی کی کارکردگی بہتر بنائے گی، نمایاں لاگت بچت پیدا کرے گی اور کمپنی کی طویل مدتی آپریشنل پائیداری کو مضبوط کرے گی۔

پاکستان میں متبادل توانائی کے ذرائع، خصوصاً شمسی توانائی، کی جانب رجحان میں مسلسل اضافہ ہو رہا ہے۔ رہائشی اور کمرشل شعبوں میں سولر توانائی تیزی سے مقبول ہو رہی ہے۔

اس بڑھتے ہوئے رجحان نے پالیسی سازوں کو قومی گرڈ اور توانائی کے شعبے پر اس کے اثرات پر غور کرنے پر مجبور کر دیا ہے، کیونکہ ملک میں بجلی کی کھپت بدستور جمود کا شکار ہے۔

جے کے اسپننگ ملز لمیٹڈ (جے کے ایس ایم) کو پاکستان میں 7 جنوری 1987 کو منسوخ شدہ کمپنیز آرڈیننس 1984 (جو اب کمپنیز ایکٹ 2017 ہے) کے تحت بطور پبلک لمیٹڈ کمپنی شامل کیا گیا تھا۔

کمپنی ٹیکسٹائل مینوفیکچرنگ کے شعبے سے وابستہ ہے، جس میں کپاس کی جننگ، اسپننگ، سلائی، یارن (دھاگے)، کپڑے اور دیگر مصنوعات کی خرید و فروخت شامل ہے۔