سعودی دفاعی حکام کا امریکا کا دورہ، دفاعی تعاون پر بات چیت

سعودی عرب کے معاون وزیر دفاع برائے ایگزیکٹو امور ڈاکٹر خالد البیاری نے امریکا کا دورہ کیا، جہاں انہوں نے دونوں ممالک کے درمیان دفاعی تعاون کو مزید مضبوط بنانے، فوجی صنعتوں، ٹیکنالوجی کی منتقلی اور علاقائی سلامتی کے شعبوں میں تعاون بڑھانے پر تبادلہ خیال کیا۔

ڈاکٹر خالد البیاری نے اپنے دورے کا آغاز امریکی دفاعی سلامتی تعاون ایجنسی (ڈی ایس سی اے) سے کیا، جہاں انہوں نے ایجنسی کی ڈائریکٹر میری مورگن سے ملاقات کی۔ اس موقع پر دفاعی صنعتی تعاون کا جائزہ لیا گیا اور باہمی دلچسپی کے امور پر گفتگو کی گئی۔

بعد ازاں پینٹاگون میں علیحدہ علیحدہ ملاقاتوں کے دوران انہوں نے امریکی انڈر سیکریٹری دفاع برائے حصول و رسد مائیکل ڈفی، انڈر سیکریٹری دفاع برائے پالیسی ایلبرج کولبی اور امریکی فضائیہ کے انڈر سیکریٹری برائے بین الاقوامی امور جنٹری اسٹیفن سے ملاقات کی۔

ان ملاقاتوں میں سعودی عرب اور امریکا کے درمیان دفاعی تعاون کو مزید فروغ دینے اور مشترکہ مفادات و علاقائی سلامتی کے فروغ کے لیے اسٹریٹجک شراکت داری کو وسعت دینے کے مواقع پر تبادلہ خیال کیا گیا۔

ڈاکٹر خالد البیاری نے امریکی انڈر سیکریٹری آف اسٹیٹ برائے اسلحہ کنٹرول اور بین الاقوامی سلامتی تھامس ڈی نانو سے بھی ملاقات کی، جس میں سعودی امریکا تعلقات اور خطے و دنیا میں امن، سلامتی اور استحکام کے فروغ میں دونوں ممالک کے کردار پر گفتگو کی گئی۔

دورے کے اختتام پر ڈاکٹر خالد البیاری نے امریکا کی متعدد معروف دفاعی کمپنیوں کے چیف ایگزیکٹو افسران سے ملاقات کی۔ اس دوران سعودی وژن 2030 کے اہداف کے مطابق دفاعی صنعت، تحقیق و ترقی ، ٹیکنالوجی کی منتقلی اور دفاعی صنعتوں کی مقامی سطح پر ترقی (لوکلائزیشن) کے شعبوں میں تعاون کے امکانات کا جائزہ لیا گیا۔

کاپی رائٹ بزنس ریکارڈر، 2026