قراقرم میں برفانی تودہ گرنے سے معروف کوہ پیما نمز دائی سمیت 10 افراد لاپتا

الپائن کلب آف پاکستان (اے سی پی) نے جمعہ کو بتایا کہ براڈ پیک پر برفانی تودہ گرنے کے بعد لاپتا ہونے والے 10 کوہ پیماؤں کی تلاش اور ریسکیو آپریشن میں معاونت کے لیے پاک فوج کے ایوی ایشن ونگ کے دو ریسکیو ہیلی کاپٹر عملے اور خصوصی آلات سمیت روانہ کردیے گئے ہیں۔

یہ فضائی امداد قراقرم کے سلسلۂ کوہ میں واقع 8,047 میٹر بلند براڈ پیک پر انتہائی دشوار گزار بلندی پر زمینی ریسکیو ٹیموں کی مدد کے لیے فراہم کی گئی ہے تاکہ لاپتا کوہ پیماؤں کو تلاش کرکے محفوظ نکالا جا سکے۔

لاپتا ہونے والے کوہ پیماؤں میں معروف نیپالی کوہ پیما نرمل پرجا (نمز دائی) بھی شامل ہیں۔ ان کے ساتھ پانچ دیگر نیپالی کوہ پیما، پور بہادر گرونگ (یوکتا)، کیلی پیمبا شیرپا (کیلو)، نیما شیرپا، ناوانگ تھندو شیرپا اور گیالو شیرپا بھی لاپتا ہیں۔

دیگر لاپتا افراد میں پاکستان کے ضلع ہنزہ سے تعلق رکھنے والے کوہ پیما سہیل ساقی، عمان کی نذیرہ احمد عبداللہ الحارثی، امریکا کی میلوری گیس اور چین کے وانگ ژونگ شامل ہیں۔

الپائن کلب آف پاکستان کے مطابق ابتدائی اطلاعات کے مطابق جمعرات کو دوپہر کے وقت اس مہم کو برفانی تودے نے اپنی لپیٹ میں لے لیا، جس کے بعد سے تمام کوہ پیماؤں سے رابطہ منقطع ہے۔

واقعے کے فوراً بعد الپائن کلب آف پاکستان کے صدر میجر جنرل عرفان ارشد اور کلب کی اعلیٰ قیادت نے حکومتی حکام اور متعلقہ اداروں سے رابطہ کرکے، موسم کی صورتحال کو مدنظر رکھتے ہوئے، تمام دستیاب ریسکیو وسائل کو متحرک کیا۔

الپائن کلب آف پاکستان نے پاک فوج کے ایوی ایشن ونگ اور ریسکیو آپریشن میں شریک تمام اداروں کی فوری کارروائی اور تعاون کو سراہتے ہوئے کہا ہے کہ لاپتا کوہ پیماؤں کی تلاش اور ریسکیو آپریشن تاحال جاری ہے۔