بلوچستان میں سکیورٹی فورسز کی کارروائی، 4 دہشت گرد ہلاک
- ضلع خضدار میں انٹیلی جنس کی بنیاد پر کیے گئے آپریشن کے دوران بارود سے بھری دو گاڑیاں تباہ کر دی گئیں، آئی ایس پی آر
پاکستان کی سکیورٹی فورسز نے جمعرات کو بلوچستان کے ضلع خضدار میں انٹیلی جنس کی بنیاد پر کیے گئے ایک آپریشن کے دوران چار دہشت گردوں کو ہلاک اور بارود سے بھری دو گاڑیاں تباہ کر دیں۔
پاک فوج کے شعبہ تعلقاتِ عامہ (آئی ایس پی آر) کے مطابق آپریشن ”فتنۃ الہندوستان“ سے تعلق رکھنے والے دہشت گردوں کی موجودگی کی اطلاع پر کیا گیا۔
آئی ایس پی آر نے بتایا کہ آپریشن کے دوران سکیورٹی فورسز نے دہشت گردوں کی جانب سے استعمال کی جانے والی بارود سے بھری دو گاڑیوں (وی بی آئی ای ڈیز) کی نقل و حرکت کا سراغ لگایا۔ فورسز نے بروقت کارروائی کرتے ہوئے دونوں بارودی گاڑیاں تباہ کر دیں اور چاروں دہشت گردوں کو ہلاک کر دیا۔
فوج کے مطابق علاقے میں مزید دہشت گردوں کی موجودگی کے خدشے کے پیش نظر کلیئرنس آپریشن جاری ہے۔
آئی ایس پی آر نے کہا کہ پاکستان کی سکیورٹی فورسز اور قانون نافذ کرنے والے ادارے عزمِ استحکام مہم کے تحت ملک سے بیرونی سرپرستی میں ہونے والی دہشت گردی کے خاتمے کے لیے انسدادِ دہشت گردی کی کارروائیاں جاری رکھیں گے۔
Comments