خیبر پختونخوا اور بلوچستان میں سیکیورٹی فورسز کی کارروائیاں، 32 دہشت گرد ہلاک

پاک فوج کے شعبہ تعلقات عامہ (آئی ایس پی آر) نے بتایا کہ ملک میں جاری دہشت گردی مخالف مہم کے تحت گزشتہ 24 گھنٹوں کے دوران خیبر پختونخوا اور بلوچستان میں انٹیلی جنس پر مبنی آپریشنز کے دوران سیکیورٹی فورسز نے 32 دہشت گردوں کو ہلاک کر دیا۔

آئی ایس پی آر کے مطابق یہ آپریشنز سیکیورٹی فورسز کی ان کارروائیوں کا تسلسل ہیں جنہیں اس نے بھارت کے زیرِ سرپرستی چلنے والے فتنۃ الخوارج اور فتنۃ الہندستان سے تعبیر کیا ہے۔آئی ایس پی آر کا کہنا ہے کہ خیبر پختونخوا کے ضلع خیبر میں رات کے وقت انٹیلی جنس کی بنیاد پر ٹارگٹڈ آپریشنز کیے گئے، جہاں سیکیورٹی فورسز نے دہشت گردوں کی پناہ گاہوں کا گھیراؤ کیا اور 24 دہشت گردوں کو ہلاک کر دیا۔

بلوچستان کے ضلع نوشکی میں الگ الگ آپریشنز کے دوران سیکیورٹی فورسز نے شدید فائرنگ کے تبادلے کے بعد 8 دہشت گردوں کو ہلاک کر دیا۔آئی ایس پی آر نے بتایا کہ آپریشن کے دوران دہشت گردوں کے زیرِ استعمال اسلحہ، گولہ بارود اور بارودی مواد برآمد کر کے تلف کر دیا گیا ہے۔

آئی ایس پی آر کا مزید کہنا ہے کہ متاثرہ علاقوں میں کسی بھی باقی ماندہ خطرے کو ختم کرنے کے لیے علاقے کو پاک کرنے کا عمل جاری ہے۔انہوں نے مزید کہا کہ قومی ایکشن پلان کی وفاقی اپیکس کمیٹی سے منظور شدہ عزمِ استحکام حکمتِ عملی کے تحت ملک کی دہشت گردی مخالف مہم پاکستان سے غیر ملکی سرپرستی میں ہونے والی دہشت گردی کے خاتمے تک جاری رہے گی۔