امریکی ارکانِ کانگریس کی فیلڈ مارشل عاصم منیر سے ملاقات، سکیورٹی اور اقتصادی تعاون پر تبادلۂ خیال

امریکی ایوانِ نمائندگان کے دو ارکان نے پیر کو جنرل ہیڈکوارٹرز (جی ایچ کیو) میں چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سے ملاقات کی، جس میں علاقائی سلامتی، دفاعی تعاون اور دوطرفہ اقتصادی روابط کے فروغ پر تبادلۂ خیال کیا گیا۔

پاک فوج کے شعبۂ تعلقاتِ عامہ (آئی ایس پی آر) کے مطابق ریاست مونٹانا سے منتخب رکنِ کانگریس ریان کیتھ زنکے اور ریاست واشنگٹن سے رکنِ کانگریس مائیکل جیمز نے آرمی چیف سے باہمی دلچسپی کے امور، علاقائی سلامتی اور دوطرفہ اقتصادی تعاون کو وسعت دینے کے امکانات پر گفتگو کی۔

ملاقات کے دوران فیلڈ مارشل سید عاصم منیر نے پاکستان کی اقتصادی صلاحیتوں کو اجاگر کرتے ہوئے کہا کہ خطے میں پائیدار استحکام کا براہِ راست تعلق معاشی ترقی، تجارت کے فروغ اور علاقائی روابط کے استحکام سے ہے۔

انہوں نے ملک میں جاری ساختی اصلاحات کا بھی ذکر کیا، جن کا مقصد کاروبار دوست ماحول پیدا کرنا اور غیر ملکی سرمایہ کاری کو راغب کرنا ہے۔

امریکی ارکانِ کانگریس نے خطے میں استحکام کے فروغ اور معاشی مضبوطی کے لیے پاکستان کے کردار کو سراہا۔ دونوں جانب سے دوطرفہ تجارت، نجی شعبے کے درمیان شراکت داری اور وسیع تر اقتصادی تعاون کے امکانات پر بھی تبادلۂ خیال کیا گیا۔

آئی ایس پی آر کے مطابق امریکی وفد نے پرتپاک میزبانی پر پاک فوج کی قیادت کا شکریہ ادا کیا اور پاکستان اور امریکہ کے درمیان اقتصادی، تجارتی اور ادارہ جاتی تعلقات کو مزید مضبوط بنانے کے عزم کا اظہار کیا۔