پاکستان کی بھارتی وزیر دفاع کے اشتعال انگیز بیان کی شدید مذمت

پاکستان نے بھارتی وزیر دفاع راجناتھ سنگھ کے اشتعال انگیز اور غیرذمہ دارانہ بیان کی شدید مذمت کی ہے۔

ترجمان دفتر خارجہ طاہر اندرابی کے مطابق بھارتی وزیر دفاع کا بیان جموں و کشمیر تنازع سے متعلق حقائق مسخ کرنے کی کوشش ہے۔ جموں و کشمیر اقوام متحدہ کی سلامتی کونسل کے ایجنڈے پر موجود بین الاقوامی طور پر تسلیم شدہ تنازع ہے۔

ترجمان دفتر خارجہ کے مطابق بھارتی حکومت کے بیانات علاقائی اور عالمی امن و سلامتی کے لیے خطرہ ہیں۔

یہ پیش رفت بھارتی وزیر دفاع راج ناتھ سنگھ کے اتوار کو ایک تقریب سے خطاب کے بعد سامنے آئی جس میں انہوں نے دعویٰ کیا تھا کہ آزاد کشمیر بھارت کا حصہ ہے۔

طاہر اندرابی نے کہا کہ بھارت ایسے بیانات کے ذریعے مقبوضہ جموں و کشمیر پر اپنے غیرقانونی قبضے، دہشت گردی کی سرپرستی اور داخلی عدم استحکام سے توجہ ہٹانا چاہتا ہے۔

ترجمان دفتر خارجہ نے کہا کہ بھارت پاکستان کے عزم کو کمزور سمجھنے کی غلطی نہ کرے۔ پاکستانی قوم اور مسلح افواج نے گزشتہ سال آپریشن بنیان مرصوص میں بھارتی جارحیت کا مؤثر جواب دیا۔

ترجمان دفتر خارجہ نے کہا کہ پاکستان نے اقوام متحدہ سے بھارت کے مسلسل غیرذمہ دارانہ طرزِ عمل کا نوٹس لینے اور سلامتی کونسل کی قراردادوں کے مطابق کشمیریوں کے حقِ خودارادیت کو یقینی بنانے کے لیے بھارت کو جوابدہ ٹھہرانے کا مطالبہ کیا ہے۔