آپریشن شعبان : بلوچستان میں سیکیورٹی فورسز کی کارروائی، مزید 4 دہشت گرد مارے گئے

بلوچستان میں پاک فوج، فرنٹئیر کور (ایف سی) اور بلوچستان پولیس کا مشترکہ ”آپریشن شعبان ” کامیابی سے جاری ہے، جس کے دوران سیکیورٹی فورسز نے تحریک طالبان پاکستان عرف فتنہ الخوارج سے تعلق رکھنے والے مزید چار دہشت گردوں کو ہلاک کر دیا ہے۔

سرکاری خبر رساں ادارے اے پی پی نے منگل کو سیکیورٹی ذرائع کے حوالے سے یہ رپورٹ پیش کی ہے۔سیکیورٹی ذرائع کا کہنا ہے کہ مربوط فضائی اور زمینی کارروائیوں کے نتیجے میں اب تک آپریشن شعبان کے دوران ہلاک ہونے والے دہشت گردوں کی مجموعی تعداد 83 تک پہنچ گئی ہے۔ذرائع نے مزید بتایا کہ سیکیورٹی فورسز علاقے میں فتنہ الخوارج کے دہشت گردوں کے خلاف انتہائی مؤثر کارروائیاں کر رہی ہیں اور اس مسلسل فوجی دباؤ اور کارروائیوں کے نتیجے میں دہشت گردوں کو بھاری جانی و مالی نقصان اٹھانا پڑا ہے۔

سیکیورٹی ذرائع کے مطابق 5 جولائی سے اب تک سیکیورٹی فورسز نے آپریشن شعبان اور دیگر خفیہ معلومات پر مبنی کارروائیوں کے دوران مجموعی طور پر 121 دہشت گردوں کو جہنم واصل کیا ہے۔ ذرائع کا عزم ہے کہ بلوچستان بھر میں آپریشن شعبان آخری دہشت گرد کے خاتمے تک بلا تعطل جاری رہے گا۔

یاد رہے کہ ایک روز قبل بھی سیکیورٹی فورسز کی جانب سے کی جانے والی فضائی اور زمینی کارروائیوں میں پانچ دہشت گرد ہلاک ہوئے تھے۔

دریں اثنا وزیر داخلہ محسن نقوی نے جاری ”آپریشن شعبان“ کے دوران مزید کامیابیاں حاصل کرنے پر سیکیورٹی فورسز کو زبردست خراجِ تحسین پیش کیا ہے۔

انہوں نے کہا کہ پاک فوج، ایف سی بلوچستان اور پولیس کے مشترکہ آپریشن میں ملنے والی غیر معمولی کامیابیاں انتہائی قابلِ ستائش ہیں۔ قوم فتنہ الخوارج کے دہشت گردوں کے خلاف سیکیورٹی فورسز کی مؤثر کارروائیوں کو انتہائی قدر کی نگاہ سے دیکھتی ہے۔

وزیر داخلہ نے مزید کہا کہ سیکیورٹی فورسز نے دہشت گردوں کے ناپاک عزائم کو خاک میں ملا دیا ہے۔انہوں نے واضح کیا کہ فورسز کی مشترکہ کارروائیاں دہشت گردوں کے مکمل خاتمے تک جاری رہیں گی۔ وزیر داخلہ کا کہنا تھا کہ پوری قوم دہشت گردی کے ناسور کے خلاف لڑنے والے اپنے بہادر جوانوں کے ساتھ شانہ بشانہ کھڑی ہے۔