ٹرمپ نے نیٹو رہنماؤں کو امریکا کے اتحاد میں برقرار رہنے کی یقین دہانی کرائی، ذرائع

امریکی صدر ڈونلڈ ٹرمپ نے بدھ کو انقرہ میں نیٹو رہنماؤں کے اجلاس کے دوران اتحادی ممالک کو یقین دلایا ہے کہ وہ امریکا کو نیٹو اتحاد کا حصہ برقرار رکھنا چاہتے ہیں۔ مذاکرات سے باخبر ایک ذریعے نے یہ بات رائٹرز کو بتائی۔

ذریعے کے مطابق، بند کمرہ اجلاس میں ٹرمپ نے یہ بھی کہا کہ امریکا اتحادی ممالک کو ہتھیاروں کی فروخت جاری رکھنے کے لیے تیار ہے، چاہے وہ انہیں کسی بھی مقصد کے لیے استعمال کریں۔ ذریعے نے نام ظاہر نہ کرنے کی شرط پر یہ معلومات فراہم کیں۔

ذریعے کے مطابق ٹرمپ نے نیٹو رہنماؤں سے کہا، ”ہم آپ کے ساتھ رہنا چاہتے ہیں۔“

وائٹ ہاؤس نے اجلاس میں ٹرمپ کے ان ریمارکس پر فوری طور پر کوئی تبصرہ نہیں کیا۔

ذرائع کے مطابق ٹرمپ نے اجلاس کے دوران نہ تو نیٹو کے رکن اسپین پر اپنی سابقہ تنقید دہرائی اور نہ ہی ایران کے ساتھ عبوری جنگ بندی کے معاہدے کے خاتمے سے متعلق اپنے اعلان کا ذکر کیا۔ ذریعے نے مزید بتایا کہ انہوں نے گرین لینڈ کے معاملے پر بھی بات نہیں کی، جو نیٹو اتحاد کے اندر اختلافات کا باعث بنا ہوا ہے۔

امریکی صدر اس سے قبل دفاعی اخراجات اور ایران کی جنگ کے معاملے پر اسپین کے ساتھ تجارتی تعلقات معطل کرنے کا حکم دے چکے ہیں۔