21 لسٹڈ کمپنیوں نے مالی سال 2025-26 میں 20 ارب سے زائد سرمایہ اکٹھا کیا، ایس ای سی پی
- 10 لسٹڈ کمپنیوں نے رائٹس ایشوز کے علاوہ دیگر ذرائع سے 16.7 ارب روپے سے زائد کی رقم حاصل کی
سیکیورٹیز اینڈ ایکسچینج کمیشن آف پاکستان (ایس ای سی پی) نے منگل کو بتایا کہ مالی سال 2025-26 کے دوران کل 21 لسٹڈ کمپنیوں نے کاروبار کو وسعت دینے، نئے منصوبوں اور پیداواری صلاحیت بڑھانے کیلئے کیپٹل مارکیٹ کے ذریعے 20 ارب روپے سے زائد کی رقم اکٹھی کی ہے۔
پریس ریلیز میں ایس ای سی پی نے بتایا کہ 10 لسٹڈ کمپنیوں نے رائٹس ایشوز کے علاوہ دیگر ذرائع سے 16.7 ارب روپے سے زائد کی رقم حاصل کی جبکہ 11 کمپنیوں نے رائٹس ایشوز کے ذریعے تقریباً 3.8 ارب روپے اکٹھے کیے۔
بیان میں کہا گیا کہ رائٹس ایشوز نے موجودہ شیئر ہولڈرز کو اضافی سرمایہ کاری کے ذریعے کمپنیوں کی ترقی میں مزید حصہ لینے کا موقع فراہم کیا۔
کمیشن نے کہا کہ پاکستان کی کیپٹل مارکیٹ کمپنیوں کو طویل مدتی فنانسنگ تک رسائی کے لیے ایک مؤثر پلیٹ فارم فراہم کرنا جاری رکھے ہوئے ہے اور ایکویٹی فنانسنگ کاروباری سرگرمیوں، صنعتی ترقی اور وسیع تر معاشی نمو میں معاون ثابت ہوتی ہے۔
گزشتہ ہفتے ایس ای سی پی نے بتایا کہ مالی سال 2025-26 کے دوران پاکستان میں ریکارڈ 43,559 نئی کمپنیاں رجسٹرڈ ہوئیں۔
اس اضافے کے بعد ملک میں رجسٹرڈ کمپنیوں کی مجموعی تعداد 301,615 ہوگئی ہے۔
ایس ای سی پی نے بتایا کہ گزشتہ مالی سال کے مقابلے میں کمپنیوں کی رجسٹریشن میں 24 فیصد اضافہ ہوا جو پاکستان کے کارپوریٹ سیکٹر میں مضبوط نمو کی عکاسی کرتا ہے۔
Comments