خیبر ٹوبیکو کا جنوبی کورین کمپنی کے ٹی اینڈ جی کارپوریشن کے ساتھ مفاہمتی یادداشت پر دستخط

خیبر ٹوبیکو کمپنی لمیٹڈ (کے ایچ ٹی سی) نے پیر کو اعلان کیا ہے کہ اس نے جنوبی کوریا کی معروف تمباکو اور کنزیومر گڈز کمپنی کے ٹی اینڈ جی کارپوریشن کے ساتھ ابتدائی طور پر ایک مفاہمتی یادداشت پر دستخط کیے ہیں جس کا مقصد کے ٹی اینڈ جی کے سگریٹ برانڈ پائن پیشن اسکائی کے لیے رائلٹی لائسنس کا حصول ہے۔

کے ایچ ٹی سی نے اسٹاک ایکسچینج کو بھیجے گئے ایک نوٹس میں اس پیشرفت سے آگاہ کیا۔

کمپنی نے بتایا کہ مفاہمتی یادداشت کے بعد مجوزہ لائسنسنگ انتظام کے بارے میں ایک باضابطہ معاہدہ کیا جائے گا جس کے تحت کے ایچ ٹی سی پاکستان اور دیگر ایسی حدود جن پر باہمی اتفاق ہو میں اس برانڈ کو تیار کرنے اور/یا مارکیٹ کرنے کا ارادہ رکھتی ہے۔ یہ سب حتمی معاہدوں پر عملدرآمد، تمام متعلقہ ریگولیٹری منظوریوں کے حصول اور معمول کی تجارتی شرائط کی تکمیل سے مشروط ہوگا۔

نوٹس میں مزید کہا گیا کہ کمپنی پرامید ہے کہ یہ اسٹریٹجک اشتراک ہمارے پروڈکٹ پورٹ فولیو کو مضبوط کرنے، ہماری مسابقتی پوزیشن کو بہتر بنانے اور مستقبل کے کاروباری فروغ میں معاون ثابت ہونے کی صلاحیت رکھتا ہے۔

کے ایچ ٹی سی کو 1954 میں پاکستان میں ایک پبلک لمیٹڈ کمپنی کے طور پر رجسٹرڈ کیا گیا تھا۔

کمپنی کے پورٹ فولیو میں فلٹر راڈز اور تمباکو کے علاوہ دیگر مواد بھی شامل ہیں۔

کے ایچ ٹی سی پاکستان میں مارکیٹ میں مضبوط موجودگی رکھتی ہے اور اس نے مشرقی یورپ، جنوبی و مغربی افریقہ، وسطی و جنوبی ایشیا اور مشرق وسطیٰ میں بھی اپنے ڈسٹری بیوشن نیٹ ورک کو وسیع کیا ہے۔