بلوچستان میں سیکیورٹی فورسز کی بڑی کارروائیاں، 8 دہشت گرد مارے گئے

سیکیورٹی فورسز نے بلوچستان کے اضلاع خاران اور مستونگ میں انٹیلیجنس بیسڈ دو الگ الگ کارروائیاں کرتے ہوئے بھارتی پراکسی تنظیم فتنہ الہندوستان سے تعلق رکھنے والے 8 دہشت گردوں کو ہلاک کردیا۔

پاک فوج کے شعبۂ تعلقات عامہ (آئی ایس پی آر) کے مطابق پہلا آپریشن 25 جون کو ضلع خاران میں اس وقت کیا گیا جب دہشتگردوں کے ایک گروہ کی نقل وحرکت کی مصدقہ اطلاع موصول ہوئی۔

سیکیورٹی فورسز نے بروقت کارروائی کرتے ہوئے فتنہ الہندوستان کے 3 دہشت گردوں کو ہلاک کردیا جب کہ متعدد دیگر دہشت گرد زخمی ہوئے۔

ترجمان پاک فوج کے مطابق دوسرا انٹیلیجنس بیسڈ آپریشن 26 جون کو ضلع مستونگ میں کیا گیا جہاں دہشت گردوں کے ایک ٹھکانے کو مؤثر انداز میں نشانہ بنایا گیا۔

شدید فائرنگ کے تبادلے کے بعد ایک خودکش حملہ آور سمیت 5 دہشت گرد مارے گئے۔

آئی ایس پی آر کا کہنا ہے کہ کارروائیوں کے دوران دہشتگردوں کے قبضے سے اسلحہ، گولہ بارود، دیسی ساختہ دھماکا خیز مواد اور موٹر سائیکلیں بھی برآمد کی گئیں۔

ترجمان کے مطابق علاقے میں کلیئرنس آپریشن جاری ہے تاکہ کسی بھی ممکنہ دہشت گرد کی موجودگی کا خاتمہ یقینی بنایا جاسکے۔

آئی ایس پی آر نے اپنے بیان میں کہا کہ پسیکیورٹی فورسز ملک سے دہشت گردی کے مکمل خاتمے کے لیے پرعزم ہیں اور عزمِ استحکام وژن کے تحت انسدادِ دہشت گردی کی مہم پوری قوت اور رفتار کے ساتھ جاری رہے گی۔