امریکی فوج نے شام میں فضائی حملے کے دوران داعش کے رہنما کو ہلاک کر دیا، سینٹ کام

امریکی فوج نے گزشتہ ہفتے شام کے شمال مغربی علاقے میں ایک فضائی حملہ کیا جس میں داعش کا ایک سینئر رہنما ہلاک ہو گیا۔ امریکی سینٹرل کمانڈ (سینٹ کام) نے بدھ کو یہ اطلاع دی ہے۔

سینٹ کام نے سوشل میڈیا پلیٹ فارم ایکس پر جاری بیان میں کہا کہ جمعہ کو کیا جانے والا یہ حملہ ’’ان جاری امریکی کوششوں کا حصہ تھا جن کا مقصد ایسے دہشت گردوں کو ناکام بنانا اور ختم کرنا ہے جو بیرونِ ملک امریکیوں یا خود امریکا پر حملوں کی منصوبہ بندی کر رہے ہیں۔‘‘ بیان کے مطابق اس کارروائی میں علی حسین العلوی ہلاک ہو گیا ہے۔

داعش نے صدر احمد الشرع کی حکومت کے خلاف شام میں کارروائیوں کے ایک نئے مرحلے کا اعلان کر رکھا ہے اور فروری سے اب تک متعدد حملوں کی ذمہ داری قبول کر چکی ہے۔ گزشتہ سال احمد الشرع کی حکومت داعش کے خلاف برسرِ پیکار امریکا کی قیادت میں قائم اتحاد میں شامل ہوئی تھی۔

ہفتے کے روز داعش نے شام کے شمال مشرقی صوبے حلب کے شہر منبج کے قریب ہونے والے ایک حملے کی ذمہ داری قبول کی۔

ایک دہائی قبل شامی خانہ جنگی کے دوران اپنے عروج کے زمانے میں داعش شام کے تقریباً ایک چوتھائی یا اس سے زیادہ علاقے پر قابض تھی، تاہم بعد ازاں امریکا کی قیادت میں قائم اتحاد اور دیگر مخالف قوتوں نے اسے ان علاقوں سے بے دخل کر دیا۔