لوٹے کیمیکل میں چیئرمین اور چیف ایگزیکٹو کی دوبارہ تقرری

لوٹے کیمیکل پاکستان لمیٹڈ نے بدھ کو اپنے بورڈ چیئرمین اور چیف ایگزیکٹو کی دوبارہ تقرری کا اعلان کیا۔

یہ معلومات آج پاکستان اسٹاک ایکسچینج کو فراہم کی گئیں۔

اسٹاک ایکسچینج کو دیے گئے نوٹس میں بتایا گیا ہے کہ امتیاز احمد کو بورڈ چیئرمین اور عدنان آفریدی کو کمپنی کا چیف ایگزیکٹو دوبارہ تعینات کیا گیا ہے جس کا اطلاق 23 جون 2026 سے ہوگا۔

امتیاز احمد نے اپنے کیریئر کا آغاز فلاڈیلفیا کی سینٹ جوزف یونیورسٹی میں بطور اسسٹنٹ پروفیسر کیا جہاں انہوں نے چار سال تک تدریسی خدمات انجام دیں۔ بعد ازاں انہوں نے 1990 میں یونیورسٹی آف مسیسیپی سے بزنس ایڈمنسٹریشن میں پی ایچ ڈی کی ڈگری مکمل کی۔

ان کے پاس پیٹرو کیمیکل کی صنعت میں قیادت کا 28 سال سے زائد کا تجربہ موجود ہے۔

دوسری جانب عدنان آفریدی کے پاس بلیو چپ کمپنیوں، پبلک سیکٹر اور تیزی سے ترقی کرنے والے حالات میں چینج مینجمنٹ، کاروباری تبدیلی، جدت اور منافع بڑھانے میں 30 سال سے زائد کا بین الاقوامی تجربہ موجود ہے۔

لوٹے کیمیکل پاکستان لمیٹڈ پیوریفائیڈ ٹیرفتھلک ایسڈ (پی ٹی اے) تیار اور فروخت کرتی ہے اور کراچی کے پورٹ قاسم میں ایک جدید ترین پلانٹ چلاتی ہے جس کی سالانہ پیداواری صلاحیت 5 لاکھ ٹن ہے۔

یہ کمپنی مقامی پولیسٹر اور پی ای ٹی صنعتوں کے لیے ایک اہم سپلائر ہے۔ یہ پلانٹ انوسٹا پرفارمنس ٹیکنالوجیزکے ٹیکنالوجی لائسنس کے تحت کام کرتا ہے جس کے لیے خام مال معروف بین الاقوامی سپلائرز سے حاصل کیا جاتا ہے اور یہ کمپنی ملک میں ڈاؤن اسٹریم صنعتی ترقی اور زرمبادلہ کی بچت میں اپنا کردار ادا کرتی ہے۔