مہنگائی اور شرحِ سود میں اضافے کے خدشات، سونے کی مارکیٹ ہفتہ وار خسارے کی زد میں

مہنگائی کے خدشات اور امریکی فیڈرل ریزرو کی جانب سے شرحِ سود میں ممکنہ اضافے کے باعث جمعہ کو سونے کی قیمتوں میں معمولی کمی دیکھی گئی اور یہ ہفتہ وار نقصان کی طرف گامزن رہیں۔

اسپاٹ گولڈ 0.3 فیصد کمی کے ساتھ 4,200.82 ڈالر فی اونس پر آگیا اور یہ 2.8 فیصد کے ہفتہ وار خسارے کی طرف گامزن ہے۔

دوسری جانب اگست کی ترسیل کے لیے امریکی گولڈ فیوچرز 2.6 فیصد اضافے کے ساتھ 4,222.10 ڈالر تک پہنچ گئے۔

جمعرات کو سونا چھ ماہ سے زائد کی کم ترین سطح تک گر گیا تاہم بعد ازاں یہ 4,219.69 ڈالر پر قدرے بہتری کے ساتھ بند ہوا جب امریکی صدر نے ایران پر مجوزہ فوجی حملے منسوخ کرنے اور جلد امن معاہدے کے اشارے دیے۔

ٹرمپ نے کہا کہ امریکا اور ایران ممکنہ طور پر اسی ہفتے کے اختتام تک ایک امن معاہدہ کر سکتے ہیں، جس سے آبنائے ہرمز بحری آمدورفت کے لیے دوبارہ کھل جائے گی تاہم ایران نے مؤقف اختیار کیا کہ کسی معاہدے پر ابھی حتمی فیصلہ نہیں کیا گیا ہے۔

مئی میں امریکہ کے پروڈیوسر پرائسز میں توقع سے زیادہ اضافہ ہوا جس کے نتیجے میں گزشتہ ساڑھے تین سال میں سالانہ بنیاد پر سب سے بڑا اضافہ ریکارڈ کیا گیا۔ مشرقِ وسطیٰ کے تنازعے نے توانائی مصنوعات کی قیمتوں میں اضافہ کر کے لاگت میں مزید دباؤ پیدا کیا۔

سی ایم ای گروپ کے فیڈ واچ ٹول کے مطابق تاجر اس وقت دسمبر میں امریکہ کی جانب سے شرحِ سود میں اضافے کے 60 فیصد امکان کا تخمینہ لگارہے ہیں۔

اگرچہ سونا افراطِ زر کے خلاف ایک محفوظ سرمایہ کاری کے طور پر دیکھا جاتا ہے تاہم زیادہ شرحِ سود عام طور پر اس غیر منافع بخش دھات پر دباؤ ڈالتی ہے۔

سنگاپور کے سب سے بڑے بینک ڈی بی ایس گروپ نے جمعرات کو کہا کہ وہ ریٹیل صارفین کو ٹوکنائزڈ فزیکل گولڈ فراہم کرے گا کیونکہ قیمتی دھات کی طلب میں اضافہ ہو رہا ہے اور شہر ریاست سنگاپور خود کو سونے کی تجارت کے ایک بڑے مرکز کے طور پر فروغ دینے کی کوشش کررہی ہے۔

اسپاٹ سلور 0.4 فیصد گرکر 67.11 ڈالر فی اونس پر آگئی، پلاٹینم 0.3 فیصد اضافے کے ساتھ 1,724.45 ڈالر پر پہنچ گیا جبکہ پیلیڈیم 1 فیصد بڑھ کر 1,281.75 ڈالر ہوگیا۔