اسٹار کھلاڑیوں سے محروم آسٹریلیا کو اپ سیٹ کرنے کیلئے بنگلہ دیشی کپتان پرامید

بنگلہ دیشی کپتان مہدی حسن معراج نے پیر کو 3 ایک روزہ میچوں کی سیریز کے آغاز سے ایک روز قبل کہا کہ ان کی ٹیم اسٹار کھلاڑیوں سے محروم آسٹریلوی ٹیم کے خلاف نایاب موقع سے فائدہ اٹھانا چاہتی ہے۔

تاہم آسٹریلیا کے قائم مقام کپتان جوش انگلس نے اس بات پر زور دیا کہ ان کی نوجوان ٹیم کم بیک کیلئے تیار ہے۔ یاد رہے کہ اسی ماہ پاکستان نے آسٹریلیا کو ون ڈے سیریز میں 1-2 سے شکست دی تھی۔

پہلے ون ڈے میچ سے قبل میرپور میں میڈیا سے بات کرتے ہوئے بنگلہ دیشی کپتان نے کہا کہ آسٹریلیا کے خلاف طویل عرصے بعد کھیلنا ہمارے لیے ایک بڑا چیلنج بھی ہے اور ایک شاندار موقع بھی۔

انہوں نے کہا کہ اس وقت ہماری ٹیم کے سبھی کھلاڑی بہترین فارم میں ہیں اور اگر ہم نے اپنی صلاحیتوں کا سو فیصد میدان میں پیش کیا، تو کامیابی ہمارے قدم چوم سکتی ہے۔

آسٹریلوی ٹیم اپنے کپتان مچل مارش اور ٹریوس ہیڈ کے بغیر یہاں پہنچی ہے اور جوش انگلس نے اعتراف کیا کہ ان کی غیر موجودگی سے ٹیم کو نقصان پہنچا ہے۔ دونوں کھلاڑی گزشتہ ہفتے پاکستان کے خلاف آسٹریلیا کی شکست کے دوران بھی ٹیم کا حصہ نہیں تھے، جہاں مچل مارش ٹخنے کی چوٹ سے صحت یاب ہو رہے ہیں جبکہ ٹریوس ہیڈ ذاتی چھٹی پر ہیں۔

انگلس نے کہا میرا خیال ہے کہ یہ بات بہت اہم ہے کہ کچھ نوجوان کھلاڑیوں کو ان کنڈیشنز (حالات) میں کھیلنے کا تجربہ حاصل ہو رہا ہے۔