اوہائیو میں فائرنگ کے تبادلے میں کم از کم 12 افراد زخمی

ٹولیڈو اوہائیو میں ہفتے کے روز دو افراد کے درمیان فائرنگ کے تبادلے میں کم از کم ایک درجن افراد زخمی ہو گئے۔

پولیس کے مطابق زخمیوں میں سے دو کی حالت تشویشناک ہے۔ متاثرین کی عمریں 14 سے 61 سال کے درمیان تھیں۔

پولیس نے بتایا کہ یہ واقعہ دو افراد کے درمیان فائرنگ کے تبادلے پر مشتمل تھا۔ پولیس لیفٹیننٹ ڈین گرکن نے پریس کانفرنس میں کہا کہ میں نے بہت سے واقعات دیکھے ہیں، لیکن یہ اس سے کہیں زیادہ سنگین ہے۔

پولیس ڈپٹی چیف جوزف ہیرنن کے مطابق مشتبہ افراد کی تلاش جاری ہے اور یہ ایک تیز تحقیقات ہے۔ انہوں نے کہا ہمارے پاس کچھ شواہد موجود ہیں اور ہم کچھ سراغوں پر کام کر رہے ہیں۔

ڈین گرکن نے بتایا کہ تفتیش کار متعدد افراد سے پوچھ گچھ کر رہے ہیں اور سی سی ٹی وی فوٹیج کا جائزہ لے رہے ہیں۔ ٹو لیڈو کے ڈائریکٹر آف پبلک سیفٹی جارج کرال نے عوام سے اپیل کی کہ وہ اپنے موبائل فون کی ویڈیوز فراہم کریں جو پولیس کو ملزمان تک پہنچنے میں مدد دے سکتی ہیں۔

انہوں نے کہا کہ مجھے معلوم ہے کہ معلومات موجود ہیں، براہ کرم ہماری مدد کریں تاکہ ہم آپ کی مدد کر سکیں۔

ٹولیڈو پولیس ڈیپارٹمنٹ کے مطابق افسران کو شام 5:37 بجے اس وقت طلب کیا گیا جب اولڈ ویسٹ اینڈ فیسٹیول کے قریب فائرنگ کی اطلاع ملی۔ پولیس نے فیس بک پوسٹ میں کہا کہ متعدد زخمیوں کو علاج کے لیے قریبی اسپتالوں میں منتقل کیا گیا ہے۔

اس موقع پر کئی سو افراد موجود تھے۔ جارج کرال نے کہا کہ یہ ٹولیڈو کے سب سے مشہور تہواروں میں سے ایک ہے، اور افسوس ہے کہ اس طرح کا واقعہ اسے خراب کر گیا۔

یو ایس اے میں گن وائلنس آرکائیو ویب سائٹ کے مطابق اس سال اب تک 171 اجتماعی فائرنگ کے واقعات رپورٹ ہو چکے ہیں۔ ویب سائٹ کے مطابق اجتماعی فائرنگ سے مراد وہ واقعہ ہے جس میں شوٹر کے علاوہ کم از کم چار افراد گولی لگنے سے زخمی ہوں۔