پی ایس ڈی پی 2026-27: آبی منصوبوں اور ہائیڈرو پاور کیلئے 179 ارب روپے مختص

وفاقی حکومت نے مالی وسائل کی کمی کے باعث پبلک سیکٹر ڈویلپمنٹ پروگرام (پی ایس ڈی پی) 2026-27 کے تحت پانی کے شعبے کی تقریباً 44 (43 جاری اور ایک نئی) ترقیاتی اسکیموں اور ہائیڈرو پاور منصوبوں کے لیے مجموعی طور پر 179 ارب روپے مختص کرنے کی تجویز دی ہے۔

مجموعی 179 ارب روپے میں سے تقریباً 106.620 ارب روپے مقامی فنڈنگ جبکہ 72.379 ارب روپے کرنسی کور کی ضرورت ہوگی۔

وزارتِ منصوبہ بندی، ترقی و خصوصی اقدامات کے مطابق جاری ہائیڈل منصوبوں کے لیے 42.666 ارب روپے مختص کیے گئے ہیں۔ ان میں داسو ہائیڈرو پاور منصوبہ (اسٹیج-1) کے لیے 25 ارب روپے، ورسک ہائیڈرو الیکٹرک پاور اسٹیشن (دوسری بحالی) کے لیے 4.284 ارب روپے، 1410 میگاواٹ تربیلا ففتھ ایکسٹینشن ہائیڈرو پاور منصوبے کے لیے 3.4 ارب روپے، عطا آباد لیک ہائیڈرو پاور منصوبہ (54 میگاواٹ) کے لیے 3 ارب روپے، درگئی ہائیڈرو پاور اسٹیشن کی بحالی (پی سی-ون) کے لیے 2.062 ارب روپے، 34.5 میگاواٹ ہارپو ہائیڈرو پاور منصوبے کے لیے 2.7 ارب روپے، منگلا پاور اسٹیشن کی اپ گریڈیشن اور ریفربشمنٹ کے لیے 1.4845 ارب روپے جبکہ چترال ہائیڈرو پاور اسٹیشن کی استعداد بڑھا کر 1 میگاواٹ سے 5 میگاواٹ کرنے کے لیے 736 ملین روپے رکھے گئے ہیں۔

جاری آبی شعبے کے دیگر منصوبوں کے لیے مجوزہ فنڈنگ میں دیامر بھاشا ڈیم منصوبہ (تنگیر ہائیڈرو پاور منصوبے کی شمولیت) کے لیے 25 ارب روپے، دیامر بھاشا ڈیم کے لیے زمین کے حصول اور آبادکاری کے لیے 7 ارب روپے، مہمند ڈیم ہائیڈرو پاور منصوبے کے لیے 39 ارب روپے، منگلا ڈیم کی اونچائی بڑھانے کے لیے 4.598 ارب روپے، انڈس بیسن ایریگیشن سسٹم (آئی بی آئی ایس) میں 27 اہم مقامات پر ٹیلی میٹری سسٹم کی تنصیب کے لیے 5.755 ارب روپے، کچھی کینال منصوبے کے لیے 4.874 ارب روپے، بلوچستان میں 100 ڈیمز (پیکج-تھری) کے لیے 1.093 ارب روپے، آواران ڈیم کے لیے 5 ارب روپے، پنجگور ڈیم کے لیے 5 ارب روپے، بلوچستان میں 100 ڈیمز (پیکج-IV) کے لیے 3 ارب روپے اور بلوچستان میں پٹ فیڈر کینال سسٹم کی بہتری کے لیے 5 ارب روپے شامل ہیں۔

مزید برآں گاروک اسٹوریج ڈیم (ضلع خاران) کے لیے 1.459 ارب روپے، انڈس بیسن میں فلڈ پروٹیکشن سیکٹر پراجیکٹ-III کے لیے 2 ارب روپے اور انڈس بیسن فلڈ مینجمنٹ بہتری کے لیے جاپان کی جائیکا گرانٹ کے تحت 3 ارب روپے مختص کیے گئے ہیں۔

دیگر جاری آبی منصوبوں کے لیے صرف معمولی فنڈنگ رکھی گئی ہے، جبکہ صرف ایک منصوبہ یعنی دیامر بھاشا ڈیم پاور جنریشن فیسلٹیز (4500 میگاواٹ) کے لیے 500 ملین روپے رکھے گئے ہیں۔

اس طرح پی ایس ڈی پی 2026-27 کے تحت جاری آبی منصوبوں کے لیے مجموعی طور پر 135.8335 ارب روپے کی تجویز دی گئی ہے۔

کاپی رائٹ بزنس ریکارڈر، 2026