عمان کی جانب سے مینا الفحل میں معمول کے مطابق آپریشنز جاری ہونے کے اعلان کے بعد تیل کی قیمتوں میں کمی

عالمی منڈی میں خام تیل کی قیمتوں میں جمعے کے روز اس وقت کمی دیکھنے میں آئی، جب عمان نے کہا کہ مینا الفحل بندرگاہ پر آپریشنز معمول کے مطابق جاری ہیں، جس سے قبل رائٹرز کی ایک رپورٹ میں دھماکے کے بعد تعطل کی اطلاع دی گئی تھی۔

پیٹرولیم ڈویلپمنٹ عمان نے کہا کہ مینا الفحل بندرگاہ کی سرگرمیاں متاثر نہیں ہوئیں، جبکہ اس سے قبل تین ذرائع نے رائٹرز کو بتایا تھا کہ لنگر انداز ہونے کی جگہوں کے قریب دھماکے کے بعد تیل کی لوڈنگ عارضی طور پر معطل کر دی گئی تھی۔

عمان اس ٹرمینل سے یومیہ 8 لاکھ سے 9 لاکھ بیرل خام تیل برآمد کرتا ہے۔

برینٹ کروڈ فیوچرز کی قیمت 84 سینٹ (0.9 فیصد) کمی کے ساتھ 94.19 ڈالر فی بیرل پر آ گئی، جبکہ گزشتہ سیشن میں اس میں 2.84 فیصد کمی ریکارڈ کی گئی تھی۔ امریکی ویسٹ ٹیکساس انٹرمیڈیٹ (ڈبلیو ٹی آئی ) کروڈ 1.13 ڈالر (1.2 فیصد) کمی کے ساتھ 91.91 ڈالر فی بیرل پر ٹریڈ کر رہا تھا، اس سے قبل جمعرات کو اس میں 3.1 فیصد کمی ہوئی تھی۔

دونوں کنٹریکٹس اب بھی مسلسل تین ہفتوں کی کمی کے بعد پہلی ہفتہ وار بڑھت کی طرف بڑھتے دکھائی دیے، برینٹ میں 2.4 فیصد اور ڈبلیو ٹی آئی میں تقریباً 5.1 فیصد اضافہ دیکھا گیا۔

تیل کی قیمتوں میں اضافہ اس وقت ہوا جب مشرق وسطیٰ میں کشیدگی بڑھی، امریکہ اور ایران کے درمیان امن مذاکرات تعطل کا شکار رہے اور آبنائے ہرمز میں ٹریفک محدود رہی، جہاں سے دنیا کے ایک پانچویں حصے کے برابر تیل گزرتا ہے۔

کومرز بینک کے تجزیہ کاروں نے جمعے کو کہا کہ امریکہ اور ایران کے درمیان معاہدے کی امیدیں ایک بار پھر ختم ہونے کے بعد اس ہفتے برینٹ کروڈ اور یورپی قدرتی گیس کی قیمتوں میں معمولی اضافہ ہوا۔

تاہم ان کے مطابق برینٹ کی قیمتوں میں اضافہ تیل کے ذخائر کے طویل عرصے تک برقرار رہنے، برآمدات کے متبادل راستوں اور طلب میں کمی کے باعث محدود رہا۔

دوسری جانب حزب اللہ کے سربراہ نعیم قاسم نے جمعرات کو اسرائیل اور لبنانی حکومت کے درمیان امریکی ثالثی میں ہونے والے جنگ بندی معاہدے کو مسترد کر دیا، جبکہ ایران نے کسی بھی امن معاہدے کے لیے لبنان میں جنگ بندی کو شرط قرار دیا ہے۔

امریکی صدر ڈونلڈ ٹرمپ نے جمعرات کو کہا کہ ان کے خیال میں اسرائیل اور لبنان کے درمیان پیش رفت ہو رہی ہے اور لبنان امن کا مستحق ہے۔

آئی جی مارکیٹس کے تجزیہ کار ٹونی سیکی مور نے ایک نوٹ میں کہا کہ ”مجموعی رجائیت پسندی اب بھی خبروں اور جوابی خبروں کے الجھے ہوئے جال کے باعث شدید غیر یقینی کا شکار ہے“۔

اوپیک کے سیکریٹری جنرل حیدم الغیص نے جمعرات کو کہا کہ تنظیم رواں سال تیل کی طلب میں اضافے کے اپنے 12 لاکھ بیرل یومیہ کے تخمینے پر قائم ہے، باوجود اس کے کہ مشرق وسطیٰ میں کشیدگی جاری ہے اور آبنائے ہرمز بند ہے۔

شپنگ ڈیٹا کے مطابق امریکی بحری ناکہ بندی کے باعث ایرانی تیل کی برآمدات گزشتہ چھ سال کی کم ترین سطح پر آ گئی ہیں، تاہم چین میں کمزور طلب نے اس تیل کی قیمتوں پر دباؤ برقرار رکھا ہے۔