وناسپتی مینوفیکچررز کا ایف بی آر سے گھی اور آئل انڈسٹری کے ریفنڈز فوری ادا کرنے کا مطالبہ

پاکستان وناسپتی مینوفیکچررز ایسوسی ایشن کے چیئرمین شیخ عمر ریحان نے وفاقی حکومت اور فیڈرل بورڈ آف ریونیوسے پرزور مطالبہ کیا ہے کہ گھی اور خوردنی تیل کی صنعت کے طویل عرصے سے رکے اربوں روپے کے سیلز ٹیکس ریفنڈز فوری طور پر جاری کیے جائیں۔

انہوں نے خبردار کیا کہ ریفنڈز کی ادائیگیوں میں مسلسل تاخیر نے اس شعبے کیلئے شدید مالی اور لیکویڈٹی کا بحران پیدا کردیا ہے جس کے باعث مینوفیکچررز کیلئے روزمرہ کے کاروباری امورچلانا اور ضروری خام مال کی درآمدات کو برقرار رکھنا مسلسل مشکل ہوتا جارہا ہے۔

شیخ عمر ریحان نے بتایا کہ سیلز ٹیکس ایکٹ کے سیکشن 8-B کے تحت گھی اور آئل انڈسٹری کے واجب الادا اربوں روپے کے ریفنڈز ابھی تک ایف بی آر کے پاس پھنسے ہوئے ہیں ۔

یہ ادائیگیاں طویل عرصے سے زیرِ التوا ہیں اور حکومت کی جانب سے فنڈز جاری نہ کرنے کی وجہ سے مینوفیکچررز پر شدید دباؤ بڑھ رہا ہے۔

انہوں نے اس بات پر زور دیا کہ یہ ریفنڈز خود اس انڈسٹری کا اپنا پیسہ ہیں جو پہلے ہی ٹیکسوں کی صورت میں حکومت کے پاس جمع کرایا جا چکا ہے۔

شیخ عمر ریحان کے مطابق حکومت کو صنعتی سرگرمیوں کو سہارا دینے اور معیشت کا پہیہ چلتا رکھنے کے لیے ان فندز کی فوری ادائیگی کو یقینی بنانا چاہیے۔

کاپی رائٹ بزنس ریکارڈر 2026