ایران امریکہ جنگ : کویتی وزیر خارجہ کی علاقائی امن کے لیے پاکستان کے مثبت کردار کی تعریف

کویت کے وزیرِ خارجہ شیخ جراح جابر الاحمد الصباح نے پاکستان کے مسلسل ثالثی کردار اور امریکہ و ایران کے درمیان مذاکرات کی راہ ہموار کرنے کی کوششوں کو سراہتے ہوئے علاقائی امن و سلامتی کے لیے پاکستان کے ”مثبت اور تعمیری کردار“ کی تعریف کی ہے۔

دفترِ خارجہ کے مطابق یہ پیش رفت اس وقت سامنے آئی جب نائب وزیرِ اعظم اور وزیرِ خارجہ سینیٹر محمد اسحاق ڈار نے کویتی وزیرِ خارجہ سے ٹیلی فون پر رابطہ کیا اور بدلتی ہوئی علاقائی و بین الاقوامی صورتحال پر تبادلہ خیال کیا۔

دفترِ خارجہ کے مطابق وزیرِ خارجہ شیخ جراح نے پاکستان کے مسلسل ثالثی کردار اور امریکہ و ایران کے مابین رابطوں کو آسان بنانے کی کوششوں کی تعریف کی اور علاقائی امن و استحکام کے لیے اس کے تعمیری کردار کو سراہا۔

بیان میں مزید کہا گیا کہ نائب وزیرِ اعظم/وزیرِ خارجہ اسحاق ڈار نے خطے میں پائیدار امن اور استحکام کے لیے سفارت کاری اور مسلسل مذاکرات کی حمایت کرنے کے پاکستان کے عزم کا اعادہ کیا، کیونکہ یہی بہترین راستہ ہے۔

دونوں رہنماؤں نے اس امید کا اظہار کیا کہ جاری سفارتی کوششوں کے مثبت نتائج برآمد ہوں گے اور مستقبل قریب میں پائیدار امن قائم ہوگا۔ انہوں نے پاکستان اور کویت کے درمیان مضبوط برادرانہ تعلقات کو بھی دہرایا اور مستقبل میں قریبی رابطے میں رہنے پر اتفاق کیا۔

دوسری طرف امریکی صدر ڈونلڈ ٹرمپ کے اس بیان کے بعد کہ ”معاہدے کے لیے مذاکرات جاری ہیں“ ایرانی میڈیا نے منگل کو رپورٹ کیا کہ تہران دونوں ممالک کے درمیان جنگ روکنے کے لیے امریکہ کے ایک مجوزہ معاہدے کا جائزہ لے رہا ہے۔

امریکہ اور اسرائیل کی جانب سے ایران پر حملے شروع کیے جانے کے تین ماہ سے زیادہ کا عرصہ گزرنے کے بعد اب یہ تنازع ایک تعطل کا شکار ہو چکا ہے، جبکہ عبوری معاہدے کے لیے ہونے والے زیادہ تر بالواسطہ مذاکرات اب تک بے نتیجہ ثابت ہوئے ہیں، جس کی وجہ سے آبنائے ہرمز کا بڑا حصہ بدستور بند ہے۔