امریکہ ایران کشیدگی کے باعث سونا دو ماہ کی کم ترین سطح پر آ گیا

امریکہ کی جانب سے ایران پر تازہ حملوں اور مشرق وسطیٰ میں بڑھتی ہوئی کشیدگی کے باعث جمعرات کو عالمی منڈی میں سونے کی قیمتیں دو ماہ کی کم ترین سطح پر آ گئیں، جبکہ ڈالر کی مضبوطی اور تیل کی قیمتوں میں اضافے نے سرمایہ کاروں کو محتاط بنا دیا۔

اسپاٹ گولڈ کی قیمت 1.7 فیصد کمی کے بعد 4,380.62 ڈالر فی اونس تک گر گئی، جبکہ اس سے قبل قیمت 26 مارچ کے بعد کم ترین سطح تک پہنچ گئی تھی۔ امریکی گولڈ فیوچرز بھی 1.6 فیصد کمی کے ساتھ 4,377.10 ڈالر فی اونس پر آ گئے۔

امریکی ڈالر ایک ہفتے کی بلند ترین سطح پر پہنچ گیا، جس کے باعث دیگر کرنسیوں کے حامل سرمایہ کاروں کے لیے سونا مہنگا ہو گیا۔ تجزیہ کاروں کے مطابق ایران اور امریکہ کے درمیان کشیدگی برقرار رہنے اور امن مذاکرات کے بارے میں غیر یقینی صورتحال نے ڈالر کو سہارا دیا ہے، جس سے سونے پر دباؤ بڑھ گیا۔

دوسری جانب ایران کی پاسدارانِ انقلاب کی جانب سے امریکی فضائی اڈے کو نشانہ بنانے کے دعوے کے بعد عالمی منڈی میں خام تیل کی قیمتوں میں 3 فیصد سے زائد اضافہ ریکارڈ کیا گیا۔ ماہرین کا کہنا ہے کہ تیل کی بلند قیمتیں مہنگائی میں اضافے کا سبب بن سکتی ہیں، جس کے باعث امریکی فیڈرل ریزرو شرح سود کو طویل عرصے تک بلند رکھ سکتا ہے۔

فیڈرل ریزرو کی گورنر لیزا کک نے کہا ہے کہ ایران جنگ، ٹیرف اور مصنوعی ذہانت سے متعلق سرمایہ کاری قیمتوں پر دباؤ بڑھا رہی ہے، اور ضرورت پڑنے پر شرح سود میں مزید اضافہ کیا جا سکتا ہے۔

ادھر چاندی، پلاٹینم اور پیلیڈیم کی قیمتوں میں بھی نمایاں کمی دیکھی گئی۔